October 29, 2018
Te tono raupatu a Te Whakatōhea
Te tono raupatu a Te Whakatohea
E ohorere ana tētahi o ngā māngai o Te Whakatōhea, a Maui Hudson, kaore pea i te Roopu Whakamana i te Tiriti te pūtea ki te whakarongo wawe ki tā rātou tono raupatu. Kotahi rau miriona taara te uara o te whakataunga nei, engari, i whakatārewahia e te Roopu Whakamana, whai muri iho i te kitenga o ētahi hapa i roto i te tukanga i whāia kia tau te tono raupatu nei ki mua i te aroaro o te Roopu Whakamana. Kei te pooti ngā uri o te iwi i tēnei wā nei, mēnā ka hoki ki te timatanga, ka haere tonu rānei ki te Roopu Whakamana kia tutuki ai. Hei tā Hudson, ka mahue tā te Roopu Whakamana kii atu ki te iwi, kaore pea i a rātou te pūtea ki te whakarongo wawe ki te tono, i mua i te tīmatanga o tēnei pootitanga.
Rāhuitia ngā waka ki Maungarei
Neke atu i te tekau mā tahi mano rākau ka whakatōkia ki runga i te maunga o Maungarei a ngā tau tata e tū mai nei, ko te Kāhui Maunga Tūpuna o Tāmaki kei te mahi i te mahi nei kia aio pipi anō ai te āhua ki runga i taua maunga. Atu i te tekau o Whiringa-a-rangi, ka rāhuitia te haere a ngā waka ki te tihi o taua maunga, a, hei tā te toihau o te kāhui, a Paul Majurey, ahakoa te hunga whakahē, kei te whai whakaaro rātou ki te oranga tonutanga o ngā maunga nei me ngā manu e noho ana ki reira.
Tōtara waahi rua a Ngāti Paoa
Nā wai i tōtara waahi rua, katahi ka tōtara waahi rua kē atu te iwi o Ngāti Paoa. Kua tangohia te mana o tō rātou poari kia kawe i tā rātou tono raupatu ki te Karauna. Ko Morehu Wilson anake te kaikawe i te kereme nei inaianei, whai muri iho i tā Hau Rawiri whakataha i a ia anō, e toru marama ki muri nei, a, kua whakahōtaetae te Tarahiti o te iwi te whakatūnga mai o tētahi atu ki te tūranga o Rawiri. Hei tā Wilson, kei te māharahara ngā uri o te iwi ki tēnei tū āhuatanga, arā, ki te tukinga o te poari ki te tarahiti.
Copyright © 2018, UMA Broadcasting Ltd: www.waateanews.com