October 18, 2018
Ngā Kōrero Whakaparahako mai i te Whare Mīere
Ngā Kōrero Whakaparahako mai i te Whare Mīere
Kua tū ngā tai o Ruatapu ki runga o Pāremata i ngā rā tata nei, i te whakatau kua puta a Jami-Lee Ross o te rōpu Nahinara ka heke ia i tōnā tūranga hei mema o te rōpu Nahinara.
Nō ngā mārama tata kua mahue ki muri, i rere petapeta atu rā te kōhimuhimu, ko Lee-Ross te tangata nānā ētahi whakapae whakaparahako i tōnā kaiārahi a Simon Bridges i whakaputa ki te hunga pāpāho.
Nā hei taana, kua whakataurekarekatia e ia te Kaiārahi o te rōpu i runga i tōnā hiahia ki te whai i te whakautu, waihoki, ka tuku i tōnā tūranga mema pāremata.
Te Ao Pāpāho Māori
Ka āta ruku te Kāwanatanga i te hōhonutanga o te ao pāpāho Māori, kia kitea he aha ōnā ngoikoretanga, he aha hoki ngā wāhi me whakatika e rere pai ai ngā mahi nei ki te ao hou o te ipurangi.
Koira te whakapae ā te minita whakawhanake Māori, a Nanaia Mahuta.
E ai ki ngā kōrero, ka tirohia katoatia te ao pāpāho Māori, pouaka whakāta mai, reo irirangi mai hoki, ā, e mea ana te taha āpitihana o te whare pāremata, kei te horokukū te ao pāpāho Māori ki ngā hua ka puta mai pea i tēnei arotakenga ā te Kāwanatanga.
He Rongoa mo te Mate Pukupuku ki te Pūkahukahu
Kei te akiakihia te tari Kāwanatanga o Te Pātaka Whai Oranga, ara ko PHARMAC, kia pīkau i a rātou tētahi wāhanga nui o te utu mo te hoko i tētahi rongoa mate pukupuku ki te Pūkahukahu.
E ai ki ngā kōrero, kāore e taea ana e te nuinga te rongoa nei te hoko, nō reira, e mea ana rātou, me whai āwhina rātou i tēnei tari Kāwanatanga nei.
Hei taa Aatene Andrews, te kaumātua o Te Pātaka Whai Oranga, ka tino aroha ngā kaimahi hauora ki a rātou ngā whānau e hinga ki ngā mate mamae o te mate pukupuku. Engari rā, Ka ata titiro te pātaka whai oranga hei whakamahi ake ētahi o ngā wāhanga e whā kia whai ake tētahi o ngā rongoa ki te motu whānui.
Copyright © 2018, UMA Broadcasting Ltd: www.waateanews.com