October 08, 2018
TMP kia whakatū ratonga karere kotahi
TMP kia whakatū ratonga karere kotahi
Hei tā te Minita Whakawhanake Māori a Nanaia Mahuta, me whai whakaaro te ao pāpāho Māori ki ngā tūāpapa matihiko hei anamata mō rātou. Kei te whiriwhiri Te Māngai Pāho kia whakatū ratonga karere kotahi i tēnei wā, me te mōrikarika, te ahikauri o te nuinga o ao pāpāho Māori ki tērā whakaaro. Hei tā Mahuta, ko te matihiko te huarahi ka whāia e te katoa ā tōna wā, nō reira, me tīmata ki te waihanga rautaki mo taua wā, inaianei.
Heke te taupori mauhere iwi taketake
Hei tā te Minita o te Ara Poutama, a Kelvin Davis, kei muri a Aotearoa i ētahi atu whenua o te ao i roto i tā tātou whai kia heke te taupori mauhere iwi taketake. Katahi anō a Davis ka hoki mai i tana tirotiro haere i ngā whare herehere me ngā whare whakaauraki o California me British Columbia me tana miharo ki ngā kaupapa e whakahaerehia ana kia tere ai te whakaaurakitanga o ngā mauhere kua takahi ture tātakimori, ki waenganui i o rātou whānau me o rātou hapori. I haere hoki ia ki tētahi whare herehere i Kānata mō ngā iwi taketake anake, a, kaore ngā āpiha i te mau kākahu āpiha, kaore hoki he pātū, he taiapa rānei i taua whare herehere.
Te tiaki taiao
Hei tā te Komihana Āhuarangi Māori, a Donna Awatere-Huata. Kei te iwi Māori ngā mōhiotanga e pā ana ki te tiaki taiao, engari, kaore te Kāwanatanga i te tino kōrero ki a tātou. E rua tekau ngā rohe o te motu ka tae atu nei te komihana nei, a Donna Awatere-Huata, Tā Mark Solomon, Hone Harawira me Kahurangi Tariana Turia, ki te kōrero ki ngā iwi mō te whakatō rākau kia whiwhi tohu hauwaro ai rātou. Kei te piki haere te uara o ngā tohu hauwaro nei, nō reira, he kaupapa pai te whakatō rākau mēnā rā e hiahia ana tētahi iwi ki te whakamahi whenua mō taua kaupapa. Ko te mate kē hei tā Huata, kaore anō te Kāwanatanga kia āta whakamarama mai i te āhua o tēnei kaupapa ki ngā iwi.
Tautokohia te Roopu Wai Māori hou
E whakapono ana te Minita Whakawhanake Māori a Nanaia Mahuta, ka tautokohia te Roopu Wai Māori hou. Kaore te Kāhui Rangatira-a-Iwi i whakaae ki te hono ki tēnei roopu hou, i whakarewahia ai e te Minita nei e David Parker i te wiki nei. Ko te whainga o te roopu nei, kia kimihia he ara e piki ai te hauora me te kounga o te wai Māori. Ko Kingi Smiler te ūpoko o te roopu nei, a, ko ōna hoa ko Dover Samuels, Milan Ruka, Annette Sykes, Traci Houpapa, Riki Ellison, Paul Morgan, Jacinta Ruru, Tanira Kingi, James Ataria me Mahina-a-rangi Joy Baker. Hei tā Mahuta, mā tēnei roopu ngā wawata o te ao Māori mō te wai māori, e kōkiri ki roto i ngā kaupapa a te Kāwanatanga.
Waitohu Whakaaetanga a Te Patukirikiri
Kua waitohu whakaaetanga te Karauna me tētahi o ngā iwi nohinohi o Hauraki e tau ai te tono raupatu a te iwi mō ngā whenua i tāhaengia, otirā, i tūkinohia i te wā e kimi koura ana ngā Pākehā. Ko te ingoa o te iwi nei, ko Te Patukirikiri, a, kei te tukuna te toru miriona taara ki a rātou, tae atu ki ngā whenua kei reira te hōhipera e tū ana me te kurae o Whangaparaoa. Ka whai hua hoki a Patukirikiri i te whakataunga nui a Marutūahu.
Copyright © 2018, UMA Broadcasting Ltd: www.waateanews.com