Tanu tūpāpaku ki Taupiri

Tanu tūpāpaku ki Taupiri

Nā ngā raru kua pā ki ngā whānau e tanu tūpāpaku ana ki te maunga o Taupiri, i whakatūria ai he hui, e rua rā te roa, hei āta wānanga i ngā tikanga tanu tūpāpaku ki roto i ngā urupā o Waikato Tainui. Hei tā te māngai mō te hui nei, a Brad Totorewa, ko tōna kotahi rau tāngata i tae ake ki te hui i tū ki Taupiri Marae i ngā rangi whakatā nei. He maha ngā kaupapa i kōrerohia, arā, ko te kari i te rua, ko te whakatutuki ohāki, ko te mahi a te Kaunihera, ko te mahi ā ngā kaumātua.

Poro tūranga mahi ki Whakaata Māori

Kua puta te whakatau i a Whakaata Māori, kei te poro tūranga mahi, ko ngā nama kei runga i tōna ūpoko me te panoni haeretanga o te ao pāpāho i tēnei wā, ngā take. Ko tētahi kua kore mahi, ko te tumu whakahaere i te wāhanga kawe pūrongo o Whakaata Māori, a Maramena Roderick, engari, hei tā Whakaata Māori, he mea motuhake tana rihainatanga, arā, kaore e hono ana ki te hiahia o Whakaata Māori ki te whakahou i ōna āhuatanga, otirā, ki te poro tūranga. Tekau mā iwa ngā tūranga mahi ka korehāhā i raro i ngā whakahoutanga, a, hei tā Joe Gallagher o E Tū, nō te Poari te hē, arā, nā rātou te whakatau kia nuku ki East Howick, nā rātou hoki te whakatau kia kaua e hanga papamahi pāpāho i roto i tō rātou whare hou.

Haere mai ngā kaiwhakairo pounamu nō Haina

Tērā pea ka haere mai ngā kaiwhakairo pounamu o te whenua o Haina ki konei, ki te whakaako i roto i tētahi kura hou, ko te mātauranga whakairo pounamu te iho matua o te kura. Nō te wiki nei i whakamanuhiritia ai e Ngāi Tahu me Ngāti Waewae te toru tekau mā waru kaiwhakairo pounamu nō te whenua o Haina. Hei tā te kaiwhakahaere o Te Rūnanga o Ngāi Tahu a Lisa Tumahai, i waitohua he waikanaetanga kia pakari ai te mahi tahi ki a Haina i roto i ngā mahi whakairo pounamu, hoko pounamu hoki.

Robin Hapi mō Te Mātāwai

Kua whakaūngia e te Minita Whakawhanake Māori e Nanaia Mahuta a Robin Hapi hei māngai mōna ki Te Mātāwai mō te toru tau anō. Hei tāna, mā te whakaū anō i a Hapi, ka rōnaki tonu te haere o ngā whakaritenga e tū ai te Maihi Karauna hei hoa mō te Maihi Māori i roto i te whare o te Reo Mauri Ora. He tangata noho poari a Hapi, arā, koia te heamana o te poari o Te Wānanga o Raukawa, heamana tuarua o te poari o Callaghan Innovation, māngai o te poari o Te Pou Matakana, me te heamana o te poari ohanga Māori.

Hoko poro rakau ki Āhia

Kei te tuku karere te Minita Whakawhanake Rohe a Shane Jones ki ngā whenua o Āhia e kimi poro rākau ana, taihoa ake nei ka piki te maha o ngā rākau ka whakatipuria, ka tūporohia i roto i ngā rohe o tēnei whenua. Katahi anō a Jones ka hoki mai i Haina me Hapāni, a, i a ia i reira, ka āta whakamārama atu ia ki a rātou i ngā tikanga hou mō te hoko poro rākau i a tātou. Hei tāna, ko te rohe o te Tairāwhiti, tētahi waahi hei whakangao pūtea mā ngā ūmanga nui o Āhia, inā koa, katahi anō te Kāwanatanga ka whakapau i te whā rau miriona taara ki te whakawhanake i te ohanga o taua rohe.

Whai tūranga poari hou a Jamie Tuuta

Koia te kaitiaki Māori o mua, engari, kei te whai tūranga poari hou a Jamie Tuuta. Kua eke ia ki te rārangi poto mō tētahi tūranga i runga i te poari o Fonterra, engari, me tautoko ngā kaiahuwhenua i a ia e ū atu ai ia ki taua poari. Ko ēra atu kei te rārangi poto, ko Leonie Guiney rāua ko John Nicholls, he rongonui i roto i te rāngai ahuwhenua. Nō te tau nei, ka makaro te kotahi rau, iwa tekau mā ono miriona taara i a Fonterra. Ko Tuuta te toihau ō mua o Parininihi ki Waitōtara.

Follow us on &

Copyright © 2018, UMA Broadcasting Ltd: www.waateanews.com

RELATED NEWS

Ko te ngaronga ō nga tūranga mahi Kei te ngaro tonu tetahi o tatou Kia tū motuhake ā Wairarapa