Listen Now: 
Poroporo Kaimahi ki Whakaata Māori
Ka rongo ngā kaimahi o Whakaata Māori, mēnā rā he mahi tonu wā rātou i te rā nei. Kei te whakahou a Whakaata Māori i ētahi āhuatanga ōna, a, ko te poroporo kaimahi tētahi o ngā hua o ēnei whakahoutanga. Kei te raru a Whakaata Māori i te nui o āna nama i tēnei wā, a, me waihanga rautaki hou hoki e riro ai mā ngā ara pāpāho maha e kitea ai, e mātakitakihia ai ōna hōtaka. E ai ki ngā kōrero, tērā pea e rua tekau tūranga mahi ka raru i ngā whakahoutanga.
Pakanga a Ngāti Ruanui ki a Trans Tasman Resources
E whakarite ana a Ngāti Ruanui ki te hoki ki te kooti ki te pakanga anō ki a Trans Tasman Resources. Kua tau te hiahia o TTR ki te pīnono i te whakatau a te Kooti Taiao kia kaua rātou e maina onepū rino i te moana i Pātea. Hei tā te tāhūhū rangapū o Ngāti Ruanui a Debbie Ngarewa Packer , i te āhua nei, kaore a TTR, he umanga nō Ahitereiria, i te whakapono ka angitū tā rātou tono pīnono, engari, e whai ana rātou i tēnei huarahi kia kore ai rātou e kōhetengia rawatia e ngā kaipupuri hea. Hei tāna, kua kii kē atu te Kooti Taiao me te Kooti Teitei ki a TTR, ka kino te hua ki te moana, ina whakaaetia tō rātou hiahia kia mainahia te rima tekau miriona tana onepū rino, ia tau.
Ratonga Tirotiro Tūpāpaku ki Tauranga
Kei te hiahia ngā iwi o Tauranga kia tūwhera anō te ratonga tirotiro tūpāpaku o te rohe. Hei tā Buddy Mikaere o Ngāti Pukenga me Ngāti Tamarāwaho, nō te tau rua mano tekau i katia ai te ratonga nei, nā te mea, he nui rawa te utu ki te whakahou i ngā hautanga o te ratonga, ka mutu, i Rotorua me Kirikiriroa ētahi ratonga tirotiro tūpāpaku hei kawe atu mā ngā iwi o Tauranga o rātou tūpāpaku ki reira. Hei tā Mikaere, ko Tauranga tētahi o ngā rohe e kaha nei te tipu, puta noa i te motu, nō reira, me whai ratonga tirotiro tūpāpaku anō rātou.
Tu ai tētahi ratonga karere Māori kotahi
Hei tā te Minita Whakawhanake Māori tuarua a Willie Jackson, kei te kanae rere tahatū haere te tāhūhū rangapū o Te Māngai Pāho, a, kua tae ki te wā e kupengatia ai. Ko Jackson te toihau o Te Whakaruruhau i ngā wā o mua, katahi ka heke iho kia haere ki te whare pāremata i te taha o Reipa. Hei tāna, kei te tūmeke katoa ia i te whāinga a Larry Parr kia whakakorengia a Te Karere, a Te Kaea me Waatea kia tū ai tētahi ratonga karere Māori kotahi. Hei tā Jackson, kaore ngā ratonga auraki i te whakakotahi ki te penapena pūtea, nō reira, he aha te Māori e mahi pēnā ai? Hei tā Jackson, kaore a Parr i te whakaae kia hui rāua. Hei tā Jackson anō, kaore a Parr i te mārama, i te āta whai whakaaro rānei ki te hītori nui o te ao pāpāho Māori.
Hui-a-tau mo te Roopu Wāhine Māori Toko i te Ora
Hei tā te Perēhitini o te RWMTO a Prue Kapua, ka wero tonu rātou i a Oranga Tamariki me ēra atu tari kāwanatanga kia tukuna te mana ki ngā kaupapa Māori ki te iwi Māori hei whakahaere mā tātou. Hei tēnei wiki, ka tū te hui-a-tau a te Roopu, a, ko ētahi kaupapa kei te rārangi kaupapa o te hui nei, ko te tūkinotanga, te taitōkaitanga, te rangatiratanga o te mātauranga Māori, me ngā kaupapa a te Kāwanatanga. Hei tā Kapua, ahakoa kei te tōtara waahi rua te Roopu i tēnei wā, ko tōna tūranga perēhitini te take, ka kaha tonu rātou katoa ki te whakaputa kōrero mō ngā take wāhine Māori, take whānau Māori, otirā, take iwi Māori.
Pire Peke Waka
E ai ki ngā kōrero, ka puta te ihu o te pire peke waka hei ture i roto i te roanga o tēnei wiki. Koia tēnei ko te pire e tauārai ana i te whakawhitinga o tētahi kaitorangapū i te roopu nānā nei ia i kawe ki te whare pāremata, ki tētahi atu roopu, ki tētahi tūranga tū kotahi rānei. Hei tā Winston Peters, kaiārahi i te roopu Aotearoa Tuatahi, nā rātou tēnei pire i kōkiri kia mutu ai tērā āhuatanga, otirā, kia pirihonga ai ngā kaitorangapū ki o rātou roopu. Hei ēnei rangi whakatā nei ka tū te hui-a-tau a Aoteroa Tuatahi ki roto o Tauranga, hei reira hoki rātou whakanui ai i to rātou huritau rua tekau mā rima.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
