Donna Awatere Huata Tūāpapa Hauwaro Māori

Koia te Komihana Āhuarangi Māori hou, a, hei tāna, e tika ana kia whai waahi nui te iwi Māori ki te kaupapa o te whakaheke i te nui o te hauwaro e puta ana i tēnei whenua ki te āhuarangi. No nā noa nei i kopoua ai a Donna Awatere Huata ki tēnei tūranga hou, e te Tūāpapa Hauwaro Māori. Kei te whakatū te Kāwanatanga i ēnei momo roopu nei kia pai ai tana whakatutuki i te kawenata i waitohua ai e tātou o tēnei whenua, i Paris i te tau rua mano tekau mā rima. Ko te ngako o taua kawenata, kia whakaheke i te nui o te hauwaro e rere ana i tēnei whenua ki te rangi.

Manatū Paihere Māori Karauna

Ka uru te Tari Whakatau Tono Tiriti, te roopu e arotake ana i ngā tono mō te mana o te takutai moana, me te tari whakatau tono raupatu o te Manatū Ture ki raro i te maru o te Manatū hou e kiia nei ko te Manatū Paihere Māori Karauna, arā, ko Te Arawhiti. Ko Kelvin Davis, kaiārahi tuarua o Reipa kei te kawe i tēnei Minitatanga hou, otirā, kei te ārahi i tēnei Manatū hou, hei tāna, ko te whāinga kia mahi tahi ngā iwi me te Karauna kia puta ai he hua nui i ngā whakataunga TOW.

Utu toiora mō ngā kaimahi o Tāpoi Ngāi Tahu

Hei tā Tāpoi Ngāi Tahu, e whai ana rātou kia utua ā rātou kaimahi katoa ki te utu toiora, arā, ki te rua tekau tāra, rima tekau mā rima hēneti i te haora. Ko Tāpoi Ngāi Tahu tētahi o ngā roopu tāpoi nui o Aotearoa, arā, tekau mā toru āna pakihi tāpoi, ko te Shotover Jet i Tāhuna me Rainbow Springs i Rotorua ētahi. Hei tā te Ūpoko o Te Rūnanga o Ngāi Tahu a Lisa Tumahai, ko Tāpoi Ngāi Tahu te wāhanga tuatahi o te iwi ki te hāpai i te kaupapa o te utu toiora, ēngari, ka whai atu ēra atu wāhanga o te iwi i taua tauira.

Whakahaere hīkoi ki Pāremata mo te 1080

He kaiātete mai rā anō, ēngari, kaore i te pai ki a ia ētahi o ngā mahi e mahia ana e te hunga whakahē i te tāoke tekau – waru tekau. Hei tā Mike Smith, ahakoa te pai o te whakaaro kia whakahaere hīkoi ki te whare pāremata i tērā wiki, ki te whakatairanga i ngā whakahē e pā ana ki te tekau – waru tekau, mōrikarika ana te ruketanga atu o ngā tūpāpaku o ngā manu taketake ki te papa i mua i te whare pāremata. Hei tā Smith, kua rangahau hōhonu ia i tēnei kaupapa, a, i tēnei wā ko te tekau – waru tekau te tāoke pai hei patu i ngā kīrearea i roto i o tātou ngahere, ēngari, mā ngā hapū o ia rohe te kaupapa e whiriwhiri ki tā rātou e pai ai.

Hui mō Ngāpuhi ki Tāmaki

E tonoa ana ngā uri o Ngāpuhi kia āta whiriwhiri i te whakaaro kia riro mā ngā roopu e ono o te iwi e kawe te tono raupatu nui a Ngāpuhi ki mua i te aroaro o te Karauna. I Whangārei ngā kaikōkiri i tēnei whakaaro inanahi e kōrero ana ki te iwi, a, i te rā nei, ka hui ki ngā Ngāpuhi e noho ana ki te taone nui o Tāmaki Makaurau. Hei tā Willie Te Aho, roia mā Tūhoronuku, ko te whāinga o tēnei whakaaro, kia piki te tautoko ki a Tūhoronuku me tōna mana hei kaikawe i te tono raupatu nei. Hei tāna, mā te whakaū i te whakaaro nei kia ono ngā roopu taiwhenua, ka whai waahi ngā hapū ki ngā whakaritenga mō tēnei kaupapa nui.

Follow us on &

Copyright © 2018, UMA Broadcasting Ltd: www.waateanews.com