Te Reo Māori ki roto i ngā kura katoa

Te Reo Māori ki roto i ngā kura katoa

Me matua whakaūtoka i te reo Māori ki roto i ngā kura katoa. Koirā tā te māngai mō ngā Māori noho taone ki Te Mātāwai, tā Hemi Dale. Kei te karanga anō te roopu Kākāriki kia ako ngā tamariki katoa i te reo, a, hei tā Dale, kaiako i te hōtaka Te Huarahi Māori i Te Whare Wānanga o Tāmaki, ahakoa āhea, he wā tōna me whakaūtoka i te reo ki ngā kura kia māhorahora ōna hua ki te marea.

Pīataata te pourewa teitei inapō

I te pīataata ngā rama i runga i te pourewa teitei o Tāmaki inapō hei whakanui i te i te Wiki o te Reo Māori. He whero, he mā ngā tae o ngā rama, ā, ka pērā tonu tae atu ki te mutunga o te wiki o te reo Māori a te rā tapu. Hei te rā nei, ka whakahaerehia he hikoi ki roto o Tāmaki hei tautoko i te whakarauoratanga o te reo. Ka tīmata te hīkoi nei ki Albert Park, anā, ka haere mā te huarahi o Kuini ki te tapawhā o Aotea.

Hui mo te kopoutanga o Wally Haumaha

E harikoa ana a Kahurangi Iritana Tawhiwhirangi i te pai o te hui ki te roia e arotake ana i te kopoutanga o Wally Haumaha ki te tūranga pirihimana matua tuarua o te motu. Ko te roia nei a Mary Scholtens te kaiwhakahaere i te arotake nei. Hei tā Kahurangi Iritana, ko rātou ko ngā momo pērā i a Tā Mark Solomon, Ko tā Edward Durie, ko Titewhai Harawira ētahi o ngā mana nui o te ao Māori i takatū ake ki te kōrero ki taua roia, kia mōhio ai ia ki ngā mahi nui a Haumaha i roto i ngā tau kia rerekē ai te ahurea o ngā Pirihimana me o rātou whakaaro ki te Māori.

Āwhina a Whānau Ora i ngā whānau

Mā te tohatoha whakaaro, mā te tohatoha wheako ka pakari ake te tū a ngā ratonga Māori. Koirā te whakapono o Ricky Houghton o Te Tarahiti o Te Korowai, I puta ēnei kōrero āna, i te hui a ngā ratonga whānau ora o te ika-a-maui i te wiki nei. 600 māngai whānau ora i tae mai ki te hui, a, hei tā Houghton, kei te āwhina te kaupapa whānau ora i ngā whānau ki te kimi huarahi e puta ai rātou i te hāputa o korekore.

Pire tiaki i ngā ika taketake

Kua puta te pire e whai ana ki te tiaki i ngā ika taketake o ngā wai Māori o te motu, i tana pānuitanga tuatahi i te whare pāremata. Hei tā te Minita i ngā take Taiao, a Eugenie Sage, he haurua o ngā ika taketake o ngā wai Māori o te motu, e mōrearea ana te noho.

Follow us on &

Copyright © 2018, UMA Broadcasting Ltd: www.waateanews.com

RELATED NEWS

Haramai nei te ahua ō te inanga Hindu council first gathering set for this weekend He taumaha te noho te nuinga o ngā whanau i te Tai Tokerau