September 09, 2018
Tīmata Te Wiki o te reo Māori
Te Wiki o te reo Māori
Koinei te tīmatanga o te wiki o te reo Māori, a, kei te kawea e te hunga tautoko i te reo, te kaupapa o tēnei wiki ki ngā huarahi o te motu. E toru ngā hīkoi ka whakahaerehia i te wiki nei ki roto o Tāmaki Makaurau, arā ki Te Raki Paewhenua a te rā apa, te pokapū o te taone a te rā pare me Manukau a te Rā Mere. Hei tā tētahi o ngā kaiwhakahaere nō TPK, a Eru Morgan, kua tino whanake ngā kaupapa whakarauora reo i roto i ngā tau whā tekau mā ono i te hīkoi ki te whare pāremata ki te tuku i te petihana reo Māori, ā, i ēnei rā, kei te tautoko te tokomaha o te motu whānui i te hāpaitanga o te reo Māori.
Hui Whanau Ora
Hei tā te toihau o Te Pou Matakana, te roopu e whakahaere ana i a whānau ora ki te ika-a-maui, kua tae ki te wā e whakataha atu ai ngā ratonga pākehā, kia riro ai mā ngā ratonga Māori te oranga o te iwi Māori, otirā ngā whānau Māori e whakaū, e tiaki. Kei te whakawhāiti mai ngā ratonga Whānau Ora ki Tāmaki Makaurau i te rā nei mō te hui taumata ka tū ia rua tau, a, ki reira rātou tohatoha ai i o rātou mātauranga, i o rātou whēako, i o rātou angitūtanga. Hei tā Merepeka Raukawa-Tait, toihau o TPM, kua kitea te tini o ngā hua kua puta i a Whānau Ora ki o tātou whānau Māori, nō reira, me hāpai te kaupapa nei e te Kāwanatanga.
Rainbow Warrior ki Matauri
Kei te pōwhiritia te waka Rainbow Warrior tuatoru ki roto i te whanga o Matauri i te rā nei. Koirā te waahi e takoto mai nei te tūpāpaku o te waka Rainbow Warrior tuatahi. Hei tā tētahi o ngā māngai o te roopu Greenpeace a Mike Smith, ka huri te waka tuatoru nei i te motu ki te kawe i ngā kōrero me ngā whakamārama mō te kōwiritanga o te papa moana mō te hinu me ngā kino ka puta i taua mahi ki te taiao. I whakapahūngia te Rainbow Warrior tuatahi e ngā matahunahuna o Wīwī i Aotearoa i te tau 1985, a, hei tā Smith, nā tērā mahi whakatuatea i māro ai te whakaaro o Aotearoa kia karihi kore tātou.
162 tau Niupepa Wanganui Chronicle
Tuia atu ki tēnā kaupapa, hei tohu i Te Wiki o Te Reo Māori, kei te panoni te niupepa tino tawhito o te motu i tōnā ingoa. Kotahi rau, ono tekau mā rua tau te niupepa Wanganui Chronicle e whakaputa kōrero ana ki te hapori o Whanganui, a, i tēnei rā, ka whai waahi te pūreta "h" ki tōna ingoa hei mea tautoko mā te niupepa i te whakatau a ngā iwi mana whenua e toru tau ki muri nei, kia matua tuhia te "h" ki te ingoa Whanganui. Hei tā te Etita, a Mark Dawson, mai rā anō te niupepa e whakapau werawera ana ki te whakaata i ngā whakaaro o te hapori, nō reira, he mea tika kia tautoko rātou i te wiki o te reo Māori.
Copyright © 2018, UMA Broadcasting Ltd: www.waateanews.com