August 27, 2018
Whanaungatanga ki waenganui i Te Ūpoko me Te Ātiawa Toa FM
Whanaungatanga ki waenganui i Te Ūpoko me Te Ātiawa Toa FM
E ai ki tētahi o ngā kaumātua o Te Ātiawa, a Kura Moeahu, e hiahia ana te iwi kia mahi tonu Te Reo Irirangi o Te Ūpoko o te Ika i tāna mahi i roto i ngā tau maha e tū mai nei, engari, me kōrero rātou ko ngā iwi mana whenua o Te Whanganui-a-Tara, he aha te huarahi hei whai e tutuki ai tērā wawata. Kua whai raihana, kua whai pūtea hoki Te Ūpoko ki te mahi tonu mō te tekau mā rua marama, engari, ā muri atu i tēnā, wai ka mōhio. Hei tā Moeahu, me whakapakari i te whauangatanga i waenganui i Te Ūpoko me Te Ātiawa Toa FM.
1 miriona rākau a Ngāti Kahungunu me te Kaunihera
Ka mahi tahi a Ngāti Kahungunu me te Kaunihera o Te Matau-a-Maui ki te whakatō i te kotahi miriona rākau ki tētahi tūtanga whenua, rua rau, rima tekau mano heketea te rahi, e kainga ana e te wai o ngā awa me te moana i tēnei wā. I waitohua te whakaaetanga nei, arā, te Kahutia Accord i te Rā mere, a, koia tētahi o ngā wāhanga o te rautaki a te Kāwanatanga e hauwaro kore ai a Aotearoa a te tau rua mano whā tekau. Hei tā te Toihau o Ngāti Kahungunu a Ngahiwi Tomoana, mā tēnei kaupapa ka ora te whenua, ka ora hoki te wai o ngā awa.
Hikurangi Enterprises whakatipu ōkawa taru rauhea
Kua whai whakaaetanga te umanga o Hikurangi Enterprises e tū ai rātou, ko rātou te pakihi tuatahi ki te whakatipu ōkawa nei i te taru rauhea hei rongoā. E ai ki ngā kōrero, neke atu i te kotahi rau tūranga mahi ka hua ake i tēnei whakaaetanga, a, kei te tino hurō ngā rohe pēnei i a Ruatorea i tēnei tū āhuatanga, inā koa, ka whai mahi ngā tāngata o te hāpori, tuarua, ka whai hua te ōhanga o te hāpori.
Mate whakamomori i waenganui i te iwi Māori
Me kaha ake te Kāwanatanga ki te whakapau pūtea ki ngā kaupapa e ārai ana i te mate whakamomori i waenganui i te iwi Māori. Hei tā te tāhūhū rangapū o Te Rau Matatini a Maria Baker, tekau mā rua ōrau te pikinga ake o te tatauranga mō ngā Māori i mate i te whakamomori i te tau kua mahue ake nei. Hei tāna, he tini ngā āhuatanga o te mate whakamomori, engari, ko ētahi e rite tonu ana te kitea, pēnei i te pōharatanga, te kore whai waahi ki te mātauranga me te kore mahi, a, ko te Māori hoki kei te kōtihi o ngā tatauranga kino mō ēra āhuatanga.
Noho te Māori hei kaitiaki i ngā whenua me ngā awa
E akiaki ana te kaiārahi i Ngā Kākāriki, a Marama Davidson i te iwi Māori kia tohatoha tātou i wā tātou kōrero, i o tātou whēako mō te noho hei kaitiaki i ngā whenua me nga awa. Kua whai pūtea a Davidson i te Sustainable Farming Fund, e tutuki ai tēnei wawata ōna, a, ko tōna manako, mā te tohatoha i ēnei kōrero ā tātou, ka ako ngā kaipaamu, me pēhea te tiaki i te whenua me ngā awa.
Copyright © 2018, UMA Broadcasting Ltd: www.waateanews.com