Listen Now: 
Te Hui Taumata mo te Pūnaha Ture o Aotearoa
Hei tā te Peremia a Jacinda Ardern, mēnā e hiahia ana tātou kia tū he pūnaha ture pai ki tēnei whenua, me tīmata ā tātou kōrero ki ngā āhuatanga o Aotearoa, arā, tōna tuakiri me ōna tāngata, kaua e tīmata ki ngā whare herehere. I whakarewahia e te Peremia te hui taumata mō te pūnaha ture o Aotearoa i te whare pāremata inapō. Hei tāna, kua mimiti ngā mātāpono mō te haporitanga i waenganui i a tātou i roto i ngā tau, a, inaianei, e whai whakaaro ana tātou ki te kotahi, kaua ki te katoa o te whānau, ki te katoa rānei o te hapori. Hei tāna, nā tērā, i te wā ka tapepe te kotahi, kaore he whirinakihanga i reira mōnā, mea rawa ake, ka raru i te ture.
Ka tūtaki a Tauranga Moana ki a Hauraki ki rō kooti
Hei tā te kaiārahi i ngā iwi o Hauraki a Paul Majurey, kaore ngā iwi o Tauranga Moana e pono ana i roto i wā rātou tono kia tū ētahi hui ki a Hauraki i raro i ngā tikanga Māori. Hei tāna, kua tukuna e Hauraki te reo pōwhiri ki ngā kaiārahi i ngā iwi o Ngāti Ranginui, Ngāti Pukenga me Ngāi Te Rangi, engari, kua whakanano rātou i te reo pōwhiri nei me te kī ake ki a Hauraki, ka tūtaki rātou ki a Hauraki ki rō kooti. Hei tā Majurey, te āhua nei i te kōrero tikanga Māori a Tauranga, he hiahia nō rātou ki te whakaroaroa noa iho i te whakataunga tiriti ā ngā iwi o Pare Hauraki.
Ruarua haere o ngā inanga
Hei tā te toihau o te roopu Te Wai Māori, me matua whai waahi te iwi ki te kōrero mo te ruarua haere o ngā inanga i roto i o tātou awa i tēnei wā. Hei tā te roopu Ngahere Manu, me mutu te hao i aua ika, kei pau, kei korehāhā. Hei tā Ken Mair, toihau o te roopu Te Wai Māori, me āta rangahau i tēnei take, otirā, me kōrero hoki ki ngā iwi kia mārama ai te katoa, he aha ngā tikanga Māori hei tiaki i ngā inanga mā nga whakatipuranga e tū mai nei.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
