August 21, 2018
Āpōpō ka katia a Hato Petera
Āpōpō ka katia a Hato Petera
E ai ki te Toihau o Ngāti Paoa, kaore anō ngā whānau e noho whakatāuteute ana ki te marae o te kura o Hato Petera, kia kōrero ki te iwi mo taua whakatumatuma a rātou. Hei āpōpō ka katia te kura, engari, hei tā Reti Boynton, kaiārahi i te roopu e porotēhi ana, e whai pānga nui ana tōna whānau ki te whenua o te kura, a, he mea koha taua whenua e Ngāti Paoa ki te haahi katorika i ngā wā o mua mō ngā kaupapa mātauranga me te hauora. Hei tā Gary Thompson, toihau o Ngāti Paoa, ehara a Boynton i te māngai mō te iwi, a, kaore anō ia kia kawe ake i tēnei take āna ki mua i a Ngāti Paoa.
Wilson Isaac Ūpoko Roopu Whakamana i te Tiriti
Kua kopoua anō e te Minita Whakawhanake Māori, e Nanaia Mahuta a kaiwhakawā Wilson Isaac hei Ūpoko o te Roopu Whakamana i te Tiriti mo te rima tau e tū mai nei. Ka noho tonu hoki a Tā Hirini Moko Mead, Ahorangi Rawinia Higgins me tākuta Grant Phillipson ki taua roopu. Hei tā Mahuta, i kopoua anō e ia ēnei mātanga katoa ki te roopu whakamana, kia pakari tonu ai te tū a taua roopu ki te mahi i āna mahi.
Ārahi te Tarahiti o Waitangi ngā mahi tāpoi
E hiahia ana te Minita Whakawhanake Rohe a Shane Jones kia riro ma te Tarahiti o Waitangi e ārahi ngā mahi tāpoi i roto i te Tai Tokerau, engari, tuatahi ake, me whakatika taua Tarahiti i tōna anō whare. E tautoko ana te Kāwanatanga i te hiahia o te Tarahiti ki te whakatū whare pupuri taonga ki runga i te papa o te Tiriti, hei whare whakamaumahara ki te roopu rua tekau mā waru, engari, hei tā Jones, ko te taenga atu o tētahi o ngā kaimahi o mua o te Tarahiti, arā, o Wallace Tamamotu Te Ahuru ki te kooti mō te tāhae i te 1.2 miriona taara i te Tarahiti, tētahi o ngā raruraru hei whakatika mā te Tarahiti kia whakapono anō ai te iwi ki a rātou.
Copyright © 2018, UMA Broadcasting Ltd: www.waateanews.com