August 17, 2018
Hui o Ngāpuhi ki Manurewa marae
Hui o Ngāpuhi ki Manurewa Marae
Hei tā tētahi o ngā māngai mō Ngāpuhi ki roto o Hokianga, ki te tika te rautaki hei whakatau i te tono raupatu nui a Ngāpuhi, kaore e kore ka kotahi ngā hapū me ngā iwi ki te tautoko. Hei tā Piripi Moore e mārama ana ngā uri o Ngāpuhi, e ahu whakamua ai tā rātou tono raupatu me tau te puehu i waenganui i a Tūhoronuku me Te Kotahitanga. Hei tāna, i rata ia ki te kōrero a te Minita i ngā rā tata nei, arā, a Andrew Little, i kii ake rā ia, me tīmata te ahunga whakamua o te tono i roto i te rangatiratanga o ngā hapū. Kei Manurewa Marae a Little me ngā māngai o Tūhoronuku rāua ko Te Kotahitanga, e hui ana a te pō nei, whitu ki te iwa karaka.
Te matenga a Aretha Franklin
I mate a Areha Franklin inapō, koia te Kuini o te momo waiata e kiia nei, ko te Soul. 76 ōna tau ka mate nei. Hei tā tōna whānau, koia tō rātou poutokomanawa, a, i tino tūnahitia rātou ki tōna aroha, ia rā, ia rā, nōnā e ora ana. Kei te rere petapeta atu te tini o ngā maimai aroha ki a ia, i ngā kaiwaiata o te wā, mōnā i para te huarahi mō rātou.
Kei te rongo a Ardern i ngā raru kaiako
Hei tā te Peremia, a Jacinda Ardern, kei te rongo ia i ngā manawapā o ngā kaiako, a, kua whakatairangatia e rātou, i roto i tā rātou porotū i te rā apa, ngā take nui, ngā take uaua hei whakaarotanga mā te Kāwanatanga, pēnei i te whakaakotanga o te reo Māori, i te utu ki a rātou, i te nui rawa o te mahi hei kawe mā rātou.
Tautoko i te hunga kaikiri
Hei tā Willie Jackson o te Kāwanatanga, kua kaha ētahi ki te tautoko i te mana whakaputa kōrero o te hunga pērā i te tokorua kaikiri nō Kānata me te tangata i whakatū i te roopu Hobsons Pledge, me Don Brash, ēngari, ae rānei ka pērā rawa anō tō rātou kaha ki te tautoko i te mana whakaputa kōrero o te Māori. Hei tā Jackson, ko Tariana Turia, ko Hone Harawira, ko Tame Iti ētahi kua whakawahangūtia i ngā tau nei, mō te whakaputa i wā rātou kōrero mō te tāmitanga mai a te Pākeha, mō te kōhurutanga mai o ngā tūpuna e te Pākeha, ēngari, i hea te hunga e tautoko ana i a Brash mā, i taua wā ki te hāpai i tēnei mea, i te mana whakaputa kōrero?
Copyright © 2018, UMA Broadcasting Ltd: www.waateanews.com