Te mana o Te Kāhui Wai Māori

Te mana o Te Kāhui Wai Māori

Hei tā ngā māngai o te Kāhui Rangatira-a-Iwi, e kore rātou e nanao atu ki te Kāwanatanga ki te kōrero mo te wai Māori, mena rā kei te Kāwanatanga te mana ki te tohu kō wai ka noho ki te roopu hou e kiia nei ko te Kāhui Wai Māori, he aha hoki ngā tūtohinga hei whai mā taua Kāhui. Hei tā Herewini Parata o te Kāhui Rangatira-a-Iwi, kaore te Minita i ngā take Taiao a David Parker i te hāpai i ngā mātāpono o te TOW, i roto i tana whiriwhiri i te hunga ka noho ki te Kāhui Wai Māori, nā reira, e kore te Kāhui Rangatira-a-Iwi e tautapa tāngata ki taua roopu.

Ngana a Tauranga ki te hoatu pūtea ki a Pare Hauraki

Hei tā te kaiārahi i te whakataunga tiriti a Pare Hauraki, a Paul Majurey, i ngana ngā iwi o Tauranga ki te hoatu pūtea ki a Pare Hauraki, kia tuku ai a Pare Hauraki i tō rātou tūranga ki runga i te Poari Whakahaere i te Whanga o Tauranga. Hei tāna, e tatari ana ngā iwi o Pare Hauraki ki te whakautu a ngā iwi o Tauranga Moana, ki tā rātou tono kia tīmata rā ngā taha e rua ki te hui ki te matapaki i ngā tikanga Māori e tau ai te puehu i waenganui i a rātou. Hei tā Majurey, ko te wawata kia hāpai i ngā whakaaetanga i mana ai i ngā taha e rua i ngā tau o mua.

Hāmenetia a Wallace Ngamotu

Kua hāmenetia tētahi o ngā tumu whakahaere o mua o te Tarahiti-a-Motu o Waitangi, mo te tāhae i te tahi ira kati miriona taara i te Tarahiti rā. 30 ngā tau o Wallace Tamamotu Te Āhuru o Kerikeri, a, ka mauheretia ia e ngā pirihimana i tana hokinga mai i Ahitereiria i ngā rā tata nei. I tū ia ki te Kooti o Manukau i te wiki nei. Hei tā te roia tautohito rā a Bill Hodge, ko te mea ohorere o tēnei take, me pēhea te tangata e tāhae ai i tēra pūtea nui, me te kore e mau, te kore e kitea.

Whakarite whare mō te hunga kaumātua kainga kore

E karanga ana te Ope Whakaora kia tere tā te Kāwanatanga whakarite whare mō te hunga kaumātua e kainga kore haere ana i ēnei rā. Hei tā Alan Johnson, māngai pāpori mō te Ope Whakaora, kia mutu ngā rā mahi ō te hunga kaumātua, ka uaua ki a rātou te utu i ngā nama pēnei i te rēti, mea rawa ake, ka mate rātou ki te moe ki roto i o rātou waka, ki runga rānei i te huarahi. Hei tāna, kua tino kite ia i te hunga kei te reanga o te whā tekau me te rima tekau tau e moe ana i ngā huarahi.

Te reta a Tuku Morgan ki a Kingi Tuheitia

He karetao noa iho a Kingi Tuheitia e whakakanikanihia ana e tana hekeretari matua e Rangi Whakaruru. Koira tā tētahi o ngā kaitohutohu o mua o te Kīngi, tā Tuku Morgan i roto i tētahi reta tūmatanui. Hei tāna, kua mana i a Tā Wira Gardiner, ko Whakaruru te pūtake o te whakatewhatewha a te Tari Hara Tāware, arā, a te Serious Fraud Office, mōnā i whakapau kurī noa iho nei i te pūtea a Te Ururangi Trust. Hei tā Morgan, kei te heke te mana o te Kīngitanga i roto i te titiro a te motu, nā ēnei momo kūrakuraku nei.

Mā te iwi Māori e whakatau te anamata o nga tūrū Māori

He tohu o te whakamomori, he tohu o te waka e heke haere ana ki te Korokoro o te Parata, oti atu. Koira tā Shane Jones o Aotearoa Tuatahi, whai muri iho i te whakahau a te kaiārahi i a ACT, arā, a David Seymour, kia korehāhā ngā tūrū torangapū Māori. Hei tā Jones, ahakoa kua puta tērā whakahau i a Aotearoa Tuatahi i ngā wā o mua, e whakaae ana rātou mā te iwi Māori e whakatau te anamata o ngā tūru Māori, ka mutu, mēnā ka puta te karanga i a Act, he karanga mana kore noa iho.

Follow us on &

Copyright © 2018, UMA Broadcasting Ltd: www.waateanews.com

RELATED NEWS

Ko te ngaronga ō nga tūranga mahi Kei te ngaro tonu tetahi o tatou Kia tū motuhake ā Wairarapa