August 02, 2018
Te Tiriti Whakataunga a Pare Hauraki
Te Tiriti Whakataunga a Pare Hauraki
Kei te whakarite te Minita i nga take Tiriti ki te waitohu i te whakataunga a Pare Hauraki i te whare pāremata i te rā nei, ahakoa kei te whakahē tonu ngā iwi o Tauranga Moana i taua whakataunga, tae atu rā hoki ki a Ngāti Porou ki Hauraki. I haere a John Tamihere ki te kōti inanahi rā, a, hei tāna, kei te taiapatia a Ngāti Porou i te whakataunga a Pare Hauraki. Kei te tino whakahē hoki a Ngai Te Rangi o Tauranga Moana, hei tā to rātou māngai a Charlie Tawhiao, he raupatu whenua tēnei.
Ngā Mahi Tinihanga a Nahinara
Kei te riri rawa atu a Kahurangi Iritana Tawhiwhirangi ki te mahi nanakia a Nahinara, i heke iho ai a Tākuta Pauline Kingi i tāna tūranga hei ūpoko o te whakatewhatewha e pā ana ki te kopoutanga o Wally Haumaha hei komihana tuarua i te Manatū Pirihimana. I tūhura a Nahinara i ētahi kōrero taunaki i tuhia e Kingi i runga i a Linkedin i ngā wā o mua, e tautoko ana i a Haumaha. Hei tā Tawhiwhirangi, neke atu i te toru tekau tau tōna mōhio ki a Kingi, he wahine whai mana, he wahine ngākau pono.
Rārangi Pōti Māori, Auraki Rānei
Tata pou te wā ki ngā kaipōti Māori, kāore anō kua whiriwhiri mēna rānei kua rēhita mo te rārangi Māori, Auraki rānei. I tēnei rā tonu ka kati tēnei kaupapa, no reira kia kakama te whakatau i mua i te katinga o tēnei whiriwhiringa. Hei tā Mona Pauline Mangakahia no te Kōmihana Pōti o te motu, mehemea e pirangi ai koe te kimihia tētahi atu kōrero mō te kōwhiringa pōti Māori, hono atu ki te pae tukutuku www.maorioption.org.nz.
Te Rautaki Whakamua o Ngapuhi
Kua tapepe anō te ahunga whakamuatanga o te tono raupatu a Ngapuhi. Kaore tētahi o ngā kaiārahi i Te Kotahitanga o Ngā Hapu o Ngapuhi a Pita Tipene i te tino rata ki te rautaki whakamua i kōrerotia ai e rātou ko Rudy Taylor, ko Hone Sadler, ko Sonny Tau, ko te Minita i ngā take Tiriti ko Andrew Little i ngā rangi whakatā nei.
Copyright © 2018, UMA Broadcasting Ltd: www.waateanews.com