July 26, 2018
Te Tono Raupatu Nui a Ngāpuhi
Te Tono Raupatu Nui a Ngāpuhi
E whakapono ana te Ūpoko o te Rūnanga o Ngāpuhi a Sonny Tau, kua tata tae mai te wā e tau ai te tono raupatu nui a Ngāpuhi. Hei tenei rā horoi ka hui te Minita i ngā take Tiriti a Andrew Little ki a Tau rāua ko Hone Sadler o Tūhoronuku, me Rudy Taylor rāua ko Pita Tipene o Te Kotahitanga. Hei tā Tau, ko te take uaua e whakararu ana i te ahunga whakamuatanga o te tono, me pēhea te tauawhi i ngā uri o Ngāpuhi, kei ngā taone e noho ana, a, kaore e mōhio ana ki o rātou hapū, ki o rātou whakapapa. Hei tāna anō hoki, kua tūpāpaku te pūrongo Maranga Mai inaianei, koia te pūrongo i kii, me whakakore i a Tuhoronuku.
25 Tau o Aotearoa Tuatahi
Hei tā Winston Peters, ko te mea tino uruhau rawa atu o te ekenga o tana roopu, o Aotearoa Tuatahi ki tōna huritau rua tekau ma rima, ko te rānaki kero ki ōna hoariri i roto i aua tau. He mea whakatū e Peters a Aotearoa Tuatahi, whai muri iho i tana wehenga atu i a Nahinara. Hei tāna he uaua te whakapono, kei te ora tonu te roopu, e rua tekau mā rima tau i muri iho.
1000 Whare Kua Oti te Whakatū
Hei tā te Minita i ngā take Whare a Phil Twyford, kotahi mano whare kua oti i a rātou te whakatū, te whakarite rānei mō te hunga whakaraerae, pēnei i te hunga kainga kore, i tēnei takurua i tēnei wā. Nō reira, kei te waahi tika te kāwanatanga e tutuki ai tā rātou whāinga kia tū te kotahi mano, rima rau whare hou kia pai ai tā rātou turaki i te kainga koretanga.
Tinihanga te Kōrero a Sonny Tau
Hei tā te toihau takirua o Te Kotahitanga o Ngā Hapū o Ngāpuhi, he tinihanga kei roto i te kōrero a Sonny Tau mō te whakataunga a te iwi, kia tahuri ai te tokomaha ki te tautoko i tana roopu, i a Tūhoronuku. Hei tā Tau, me whai a Ngāpuhi i te kotahi ira kati rima piriona taara i roto i tā rātou whakataunga, engari, hei tā Taylor, kei te kōrero pērā a Tau kia pai ai tana patipati i te iwi.
Copyright © 2018, UMA Broadcasting Ltd: www.waateanews.com