July 25, 2018
Ngā Moni a te Iwi o Tainui
Ngā Moni a te Iwi o Tainui
Hei tā tētahi o ngā māngai o mua o Kīngi Tuheitia, kei te harikoa ia kua tae atu te tari hara tāware ki ngā tari o te Kīngi ki te whakatewhatewha i ngā whakapae mō te whakapau pūtea ki ngā waahi hē. I tae atu ngā āpiha o te tari hara tāware ki ngā tari o te Tarahiti o te Ururangi i Ngaruawāhia inanahi. Hei tā Tukoroirangi Morgan, he mea nui kia mōhio te iwi, kei te ahatia e te Tarahiti o Te Ururangi, ngā moni a te iwi.
Te Pire mō Ngā Rohe Moana o Ngāti Porou
Hei tā tētahi o ngā māngai mō tētahi o ngā hapū o te Tai Rā Whiti, ina whakamanatia te kokoraho a Ngāti Porou mō te takutai moana o te tai rā whiti, ka raru pea ngā mōtika o tōna hapū. I tāpae kōrero a Marise Lant ki te komiti whiriwhiri o te whare pāremata i Tūranga i te wiki nei e pā ana ki te pire e kiia nei, ko te pire mō Ngā Rohe Moana o Ngāti Porou. Hei tā Lant, kaore anō tōna hapū kia tuku mana ki Te Rūnanga o Ngāti Porou hei reo mō rātou. Nei ngā whakaaro o Herewini Te Koha o Te Tairāwhiti.
Te Reo Māori ki ngā Kura
Hei tā tētahi o ngai tātou i hui ki te minita nei, ki a Kelvin Davis i te wiki nei, te āhua nei, e ngākau māhaki ana te Kāwanatanga ki te tauawhi i ngā whakaaro o te Māori ki roto i tā rātou rautaki mo te reo Māori ki ngā kura. Nā Davis te tekau mā rua mātanga reo i whakahuihui ki te wherawhera i te rautaki Te Ahu o te reo Māori. Hei tā Rahui Papa, he mea nui kia tautoko tātou i ngā kaiako ki te whakaako i te reo.
Te Whakaaetanga Mayors' Taskforce
Hei tā te Minita i ngā take Kaunihera-a-rohe a Nanaia Mahuta, mā te whakaaetanga mahi tahi hou ki ngā kahika o ngā rohe, arā, te whakaaetanga Mayors’ Taskforce, ka hua ake he mahi mā ngā rangatahi i roto i o rātou ake rohe. Hei tāna, i tēnei wā nei, ko te whakaaro rā ia i waenganui i ngā rangatahi, kia mutu te kura, me hūnuku ki waahi kē atu ki te kimi mahi, engari, ko te whāinga o tēnei whakaaetanga, kia kitea he mahi mā rātou i roto i o rātou ake rohe, arā, i ngā rohe i tipu ake ai rātou.
Copyright © 2018, UMA Broadcasting Ltd: www.waateanews.com