July 02, 2018
Whakahou Pūnaha Ture a Ngāti Kahungunu
Whakahou Pūnaha Ture a Ngāti Kahungunu
E aro ana a Ngāti Kahungunu ki te whakahou i te pūnaha ture i roto i tā rātou kawenata ki te manatū Ara Poutama me te Manatū Pirihimana. I waitohu a Kahungunu, Minita i te Ara Poutama a Kelvin Davis me te tāhūhū rangapū me Ray Smith i tēnei kawenata i ngā rā tata nei. Hei tā te Pirihimana matua o Te Matau-a-Maui, a Tania Kura, ko te tuku i te hunga hara iti ki tētahi Roopu-a-Iwi kia riro mā reira taua kaihara e whakatika, e whakawhiu, tētahi wāhanga o te kawenata nei.
Kura Reo Tuatahi o Kurahaupo
Kua rēhitangia ngā tamariki tuatahi o te iwi o Kurahaupo i Te Tauihu o Te Waka ki roto i te Kura Reo Rua tuatahi o te rohe. Ko Te Pā Wānanga te ingoa o te kura, a, kei runga i te marae o Te Omaka te kura e tū ana, ki roto o Wairau. Hei tā Kiley Nepia, kaiwhakahaere i te marae, hei te wāhanga tuawhā o te tau ka tīmata te kura, ā, ko te nuinga o ngā tamariki, nō Ngāti Apa ki te Rā Tō, Ngāti Kuia me Rangitāne o Wairau.
Te Katinga o Hato Petera
No te haahi Katorika te hē e tata nei te kura o Hato Petera ki tōna katinga. Koirā tā te māngai torangapū mō Tāmaki, taa Peeni Henare. E ai ki ngā kōrero, hei ngā rā tata nei, ka heke te toki i te ringa o te Minita i ngā take Mātauaranga, arā, o Chris Hipkins ki runga i te kakī o te kura. Hei tā Henare, koia tētahi e tātāhia ana, e whakatoiharatia ana, anō nei nōna te hē e kati nei te kura, engari, hei tāna, kaore te haahi i paku aha ki te tautoko i te tūwheratanga mai o te kura rā.
Kōiwi Māori ki Māraia me Hingapoa
Kei te haere te Ope Kātua o Aotearoa ki Māraia me Hingapoa i tēnei wiki ki te hahu ake i nga kōiwi o ngā tauā o mua o Aotearoa i mate, i tanumia ki ēra whenua. Ko te ingoa o tēnei kaupapa ko Te Auraki, a, hei tā te kaiwhakahaere a Carl Nixon, ahakoa nō wai ngā kōiwi e hahua ana, ka rite ngā tikanga ka whāia e rātou mō tēna hahutanga, mō tēna hahutanga. Kei roto i te Ope Kātua mō ēnei hahutanga, he kaumātua me ētahi matanga tikanga Māori.
Copyright © 2018, UMA Broadcasting Ltd: www.waateanews.com