June 12, 2018
Hoko Whenua a Ngāti Tama ki te Kāwanatanga
Hoko Whenua a Ngāti Tama ki te Kāwanatanga
Kei te whiriwhiri a Ngāti Tama o te raki o Taranaki, mēna rā ka hoko whenua rātou ki te Kāwanatanga kia tū ai he huarahi hou ki runga. I whai a Ngāti Tama i te whenua nei i Paraninihi i raro i tā rātou whakataunga tiriti i te tau 1993, engari, e hiahia ana te Manatū Waka Kotahi ki te hoko i taua whenua mō tā rātou huarahi hou. Hei tā Greg White o Ngāti Tama, koinei te wā tuatahi kua ngana te Kāwanatanga ki te hoko whenua i tukua e rātou ki te whakatutuki tono raupatu.
Karakia ki ngā awa o Rotorua
Kei te whakahaere karakia i te ata nei ki roto o Maketu i te rohe o Te Arawa hei whakarewa i ngā mahi maioro whenua e rere anō ai te awa o te Kaituna ki te muriwai o Maketu, arā, ki Te Awa o Ngatoroirangi. Hei tā Pim de Monchy o te Kaunihera o te Moana-a-Toi, mai rā anō i te whakarerekētanga o te rere o te awa i te tau 1956, kua raru te hauora o te muriwai, arā, o Te Awa o Ngatororoirangi. Tekau mā toru miriona tāra kei te whakapaua ki tēnei kaupapa.
5 Miriona Tūruhi ia tau
Hei tā te Minita i ngā take Tāpoi a Kelvin Davis, kei te ngana a Nahinara ki te tārona i ngā kaupapa e kōkirihia ana e Reipa i runga i ngā komiti o te whare pāremata, e whanake ai te rāngai tūruhi, rāngai tāpoi rānei. Hei tā Davis, ko te hiahia o Reipa kia tae mai te neke atu i te rima miriona tūruhi ki tēnei whenua ia tau, atu i te tau rua mano rua tekau mā whā, haere ake, a, kaore e kore, ko ngā tāpoi Māori ka whai hua nui i taua whainga.
Whakamatihikohia ngā Mōheni Māori Tawhito
Kei te whakamatihikohia ngā mōheni Māori i puta i ngā tari Kāwanatanga i ngā tau o te whitu tekau me te waru tekau. Hei tā te Minita Whakawhanake Māori a Nanaia Mahuta, he mea whakaputa e te Tari Take Māori o mua ngā whārangi o Te Kaea me Tū Tangata, a, kei aua whārangi rā ētahi kōrero tuku iho tino whakahirahira rawa atu. Mā te whare pukapuka o Aotearoa aua mōheni e whakamatihiko i raro i tētahi whakaaetanga ki Te Taura Whiri i te Reo Māori me Te Puni Kōkiri.
Copyright © 2018, UMA Broadcasting Ltd: www.waateanews.com