Listen Now: 
Ngā whakaritenga mō te tangi a Te Murumāra
Ka tū te uhunga o John Moorfield ki te Haahi Mihingare o St Margaret i Te Kauwhata i te kotahi karaka a te ahiahi o te rā mere.
Whakapakari anō i a Te Puni Kōkiri
E ai ki te Minita Whakawhanake Māori a Nanaia Mahuta, kei te whakapakari anō ia i a TPK, whai muri iho i te hia tau e arokorehia ana. Mo te wā tuatahi i te tekau tau, i heke te pūtea ki a Te Puni Kōkiri i te Tahua Pūtea a te Kāwanatanga. Hei tā Mahuta, ko te mate kē, i raru nui a TPK i te whakatau kia noho taua Manatū ki waho i te Rūnanga Minita, i te wā e Kāwanatanga ana a Nāhinara me te RTM.
Pukuriri a Ngāti Kahungunu ki a Craggy Range Winery
Hei tā te kahika o Heretaunga a Sandra Hazlehurst, kei te whakahaere rātou i tētahi whakatewhatewha ahurea kia mārama ai rātou, he aha a Ngāti Kahungunu e riri nei ki te ara hikoi ki te kōtihi o Te Mata. Kei te tino pukuriri a Ngāti Kahungunu ki te pakihi o Craggy Range Winery, nā te mea, ahakoa te oati a taua pakihi, ka whakakore rātou i taua ara hikoi, kua hoki muri ake rātou i taua oati a rātou. Kua tohua e te Kaunihera ō Heretaunga ētahi mātanga ki te whakahaere i te whakatewhatewha nei. Hei tā te toihau o Ngāti Kahungunu a Ngahiwi Tomoana, kaore e kore mā tēnei whakatewhatewha, ka kitea, nā te aha te iwi i riri ai.
Iti te pūtea ki ngā kaupapa Māori
Kei te pāpare atu te Minita Whakawhanake Māori a Nanaia Mahuta i te iti o te pūtea i haere ki ngā kaupapa Māori i te tahua pūtea o tēnei tau. Ko te roopu e whakahaere ana i a Whānau ora, a Te Pou Matakana, tētahi e tino matangurunguru ana kaore rātou i paku whangaihia ki te pūtea, ā, i heke te pūtea ki Te Puni Kokiri mā te iwa miriona tāra. Hei tā Mahuta, kotahi ira kati rua piriona tāra kua tohua e Reipa hei tautoko i ngā whānau, ā, kaore e kore ka whai hua ngā whānau Māori i tērā āwhinatanga.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
