Listen Now: 
Te Tō Rākau Manuka
Kua oti he waikanaetanga mahi tahi i waenganui i te Manatū Ngahere hou e kiia nei ko Te Uru Rakau me Mānuka Farming New Zealand kia tō i a rātou te 1.8 miriona rākau mānuka puta noa i Aotearoa i tēnei tau. Hei taa te Minita i ngā take Ngahere a Shane Jones, e tutuki ai te whāinga a te Kāwanatanga kia too te kotahi piriona rākau i roto i te tekau tau e tū mai nei, me mahi tahi me ētahi atu rōpū, pēnei i a Mānuka Farming. Hei taa Jones, kei te piki te hiahia o te marea ki ngā hua o te mānuka, pēnei i te mīere me te hinu.
Whakawhiti Rārangi Pōti
Hei taa te kaiārahi i a Aotearoa Tuatahi, a Winston Peters, kei reira ngā taupātanga e whakararu ana i te whakaaro, me āhei ngā kaipōti Māori ki te whakawhiti rārangi pōti i te wā koira tō rātou hiahia, ehara i te mea, me whai rātou i tēnei kōwhiringa ia rima tau. Ko te Komihana Pōti o te motu kei te whakatere i te whakaaro, me whakakore i te kōwhiringa rārangi pōti Māori ia rima tau, heoi, hei taa Peters, ki te pērā, ka raru te manaporitanga, a, ka hua ake ētahi ngāngara pērā i ērā e ngau ana i te manapori i ngā Kuki Airani.
He Pukapuka mo te Āhua o Ngā Māori ki Ngā Tāone
He pukapuka e whakakorikori ana, e whakaoreore ana i ngā whakaaro, me pēhea te tiriwā i nga whāwhārua i waenganui i ngā whakatipuranga Māori. Koira taa te Minita i ngā take Whai Mahi, taa Willie Jackson, whai muri iho i te whakarewatanga o te pukapuka hou, ko Heke Tangata te ingoa nā te mātanga ohaoha rā, nā Brian Easton. Nā Te Whānau o Waipareira te pūtea tautoko i tēnei pukapuka, he hiahia nō rātou ki te aromātai i te āhua o ngā nekenekehanga o ngā Māori i roto i ngā tāone.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
