May 14, 2018
Shanan Halbert tūrū torangapū Northcote
Shanan Halbert tūru torangapū Northcote
Kua whakarewahia e Shanan Halbert tāna kaupapa pooti e riro ai pea i a ia te tūrū torangapū o Northcote mō Reipa. Rima rau tāngata i tae atu ki te whakarewatanga inanahi, ko te peremia tonu, ko Jacinda Ardern tētahi. E ai ki ngā kōrero, kei mua a Dan Bidois o Nāhinara i te whakataetae mo taua tūru i tēnei wā, he tūru i te puritia e Jonathan Coleman, minita ō mua i ngā take hauora, i mua i tana wehenga atu i te ao torangapū. Hei tā Halbert, ahakoa tērā kōrero, e whakapono ana ia, ka haere te tūru ki te tangata kei roto i te Kāwanatanga o te wā, ā, ko Reipa tērā.
Ngāti Whātua Ōrākei wero i te Karauna
Kei mua i te aroaro o te kooti a Ngāti Whātua Ōrākei i te rā nei me āpōpō, e wero ana i te whakatau a te Karauna kia hoatu ētahi tūtanga whenua o Tāmaki ki a Hauraki hei whakatau i tā rātou tono raupatu. Hei tā Ngarimu Blair, māngai mō Ngāti Whātua, ahakoa te whai waahi o te kāhui iwi o Marutuahu ki roto o Tāmaki Makaurau ma roto atu i te mana o Ngāti Paoa, kei te whakamahi noa iho a Marutuahu i taua mana o Ngāti Paoa ki te kokoraho whenua i roto o Tāmaki. Hei tāna, he takahi tēnei i te ahi kā roa o Paoa me Ngāti Whātua.
Whakangao Pūtea ki te Whakatipu Rauhea
Na te tini kua tahuri ki te whakangao pūtea ki tā mātou pakihi whakatipu rauhea hei rongoā, ka kite nei tātou i te huringa o ngā whakaaro ki tēnei take. Koirā tā Panapa Ehau o Waiapu Investments, te pakihi o te Tai Rāwhiti e whakarite nei ki te whakatipu taru rauhea hei rongoā. I pakaru te hamuti o te pae tukutuku o PledgeMe mo te rua rā, nā te tini i hiahia ki te whakangao pūtea ki te pakihi nei. Hei tā Ehau, ko te tohu tēnei, he mea nui ki ngā whānau te whai rongoā mō ngā uri e raru ana i ngā mate, pēnei i te mate pukupuku.
Porotū ngā Kaihautū Pahi
Kei te porotū ngā kaihautū i ngā pahi o te umanga o Go Bus ki roto o Waikato i te rā nei. Hei tā ngā kaiwhakahaere i a Go Bus, kaore rātou i paku mōhio, i te whakarite ngā kaihautū pahi ki te porotū i te rā nei, me kī pēnei, kua kōtore whererei katoa ngā kaiwhakahaere i tēnei whakatau kia porotū. Heoi, hei tā te Uepu Kaimahi o First Union, i whakatūpato rātou i ngā kaiwhakahaere i te umanga o Go Bus, e hia marama ki muri nei. Koinei te otinga, ki te kore ngā kaiwhakahaere e aro ki ngā āwangawanga o ngā kaihautū pahi. He maha ngā rohe o Waikato ka raru i te kore pahi, pēnei i a Flagstaff, Rototuna, Hillcrest me Hamilton East.
Whakamahi Pūtea mai i ngā Whakataunga Tiriti
Kua tae ki te wā e whai whakaaro ai ngā iwi ki te whakamahi i ngā pūtea e puta ake ana i a rātou whakataunga tiriti, ki te whakawhare i o rātou uri, ki te whāngai i o rātou uri me te kimi mahi ma o rātou uri. Hei tā Willy Te Aho, kaiwhiriwhiri whakataunga tiriti, kei ngā iwi ngā rawa inaianei, me tahuri ki te āwhina i ngā uri.
Tahua Pūtea Tuatahi
Hei tēnei rā pare ka pānui mai a Grant Robertson, Minita i ngā take Pūtea, tana tahua pūtea tuatahi. Hei tā Nanaia Mahuta, Minita Whakawhanake Māori, kei roto i te tahua nei ētahi pūtea hei tautoko i ngā whānau me ngā tamariki pōhara. Kua kōrero hoki a Mahuta mō te huritau kotahi rau, ono tekau ō te Kīngitanga i tū i ngā wiki nei. Hei tāna, ahakoa ngā piki me ngā heke o te Kīngitanga i roto i ngā tau, kua tū te kaupapa hei whirinakihanga mō ngā wawata o Waikato Tainui, tae atu ki te whakataunga o tā rātou take raupatu.
Copyright © 2018, UMA Broadcasting Ltd: www.waateanews.com