Listen Now: 
$1 Miriona He Kai Kei aku Ringa
E akiaki ana te Minita Whakawhanake Māori a Nanaia Mahuta i a tātou kia tono tātou i te pūtea hou i whakarewahia i tēnei wiki, mēnā rā he whakaaro auaha o tātou e whanake ai te iwi Māori. Kotahi miriona tāra kei roto i te kaupapa He kai kei aku ringa hei tohatoha atu. Hei tā Mahuta, mēnā rā he whakaaro pakihi, whakaaro whakawhanake i ngā pukenga matihiko, whakaaro waihanga mahi mā te hapu rānei, me tono i te pūtea nei.
Te Tahua Pūtea a Tērā Wiki
Ehara i te mea ka nui ngā rare o te tahua pūtea a tērā wiki. Koirā te whakatau a te Peremia tuarua a Winston Peters. Hei tāna, ko te raru kē mō te Minita i ngā take Pūtea, arā, mō Grant Robertson, ka mate ia ki te whāngai pūtea ki ngā rāngai kaore i whāngahia e Nāhinara i a rātou e Kāwanatanga ana, pērā i te rāngai hauora me te rāngai mātauranga.
Te Kino o Ngā Utu Ki Ngā Neehi, Tapuhi Hoki
Kei te whakahaere hīkoi ngā neehi me ngā tapuhi i te rā nei ki roto o Tāmaki, Te Whanganui-ā-Tara me ētahi atu rohe o te motu. Kei te hīkoi rātou ki te whakatairanga i tō rātou hiahia kia tika te utu i a rātou. E ai ki ngā kōrero, rua mano ka hīkoi i ngā huarahi o Tāmaki, ā, toru rau ka hīkoi ki ngā whata o te Whare pāremata i Te Whanganui-ā-Tara. E ai ki ngā kōrero, toru tekau ōrau o ngā tapuhi i roto o Waikato kua wehe i te mahi i ngā marama e ono noa iho nei, nā te kino o te utu.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
