April 26, 2018
Te kokoraho a Whakatōhea
Te kokoraho a Whakatōhea
Kua hē tā te Roopu Whakamana i te Tiriti e pā ana ki te kokoraho a Whakatōhea. Koirā tā te Māngai Take Māori mō Nahinara tā Nuk Korako. Hei tā te Roopu Whakamana, i pōnānā rawa te Karauna ki te whakatau i te kokoraho, nō reira, e kī ana rātou, me whakatārewa i te whakatutukihanga o te whakataunga kia whai waahi ai ngā hapu whai pānga ki te pooti. Hei tā Korako, neke atu i te kotahi tau a Nahinara e whiriwhiri ana i taua kokoraho i te wā e Kāwanatanga ana rātou, ā, kaore te Roopu Whakamana i te whai whakaaro ki tēra.
Whakatō 3,000 rākau i tēnei tau
E manako ana te Minita i ngā take Ngahere, a Shane Jones, kia tō te toru rau mano rākau i tēnei tau, hei tohu i te kotahi rau tau i te mutunga o te pakanga tuatahi o te ao. Ko te ingoa o tēnei kaupapa whakatō rākau, ko Matariki Tū Rākau. Hei tāna, ko te painga atu, mena rā ka whai waahi ngā whānau ō ngā tāngata i haere ki te pakanga, ki te kaupapa nei.
Whai whakaaro ki ngā Māori e noho taone ana
Hei tā te tāhuhu rangapū o Te Whānau o Waipareira, a John Tamihere, kua roa rawa ngā iwi e whakamahi ana i te reo me ngā tikanga Māori kia pai ai tā rātou tauārai atu i o rātou uri kei ngā taone e noho ana. Hei tā Tamihere, ki te kore ngā iwi e whai whakaaro ki o rātou uri kei ngā taone e noho ana, i roto i tā rātou whiriwhiri i ā rātou whakataunga tiriti, tēra pea ko te kooti te otinga ake, arā, ka hari ia i ngā iwi ki te kooti.
Te āpōpōtanga o te mātauranga Māori
E hiahia ana te Minita tuarua i ngā take Mātauranga a Kelvin Davis ki te whakarongo ki ngā whakaaro o te iwi Māori mo te āpōpōtanga o te mātauranga Māori. Tekau mā toru ōrau noa iho o te rima mano Māori i whakapā atu rā te Minita, kua tahuri ki te whakakī i te rangahau-ā-ipurangi e kiia nei, ko Kōrero Mātauranga – Education Conversation survey about Māori. Hei tā Davis, he mea nui kia whakatū pūnaha mātauranga tātou e tino angitū ai ngā tauira Māori.
Copyright © 2018, UMA Broadcasting Ltd: www.waateanews.com