April 22, 2018
Kaupapa Whakatō Rākau ki Manutuke
Kaupapa Whakatō Rākau ki Manutuke
Kua whakatōkia ngā rākau tuatahi o te kaupapa kotahi piriona rākau a te Kāwanatanga. Nā te Minita i ngā take Ngahere, na Shane Jones te rākau tuatahi i whakatō inanahi i te Kura Tuatahi o Manutuke, otirā, ko Meka Whaitiri, māngai torangapū mō te Ikaroa Rawhiti rāua ko te kahika ō Tūranga a Meng Foon, ētahi atu i whakatō rākau inanahi. Hei tā Jones, he rākau taketake te katoa o ngā rākau i whakatōkia, arā, he kōwhai, tōtara, kahikatea, pūriri me te mātai, ā, koia tēnei ko te tīmatanga o te kaupapa, tekau tau te roa. E heke iho ai te rere o te hauwaro ki te taiao, e hua ai he tūranga mahi mo te marea.
Hui mō ngā take Whare ō Tāmaki Makaurau
Kei te whakahaere hui ki roto o Tāmaki Makaurau i te rā nei hei āta wānanga i ngā take whare o te takiwā nei. Ka tae atu te Minita i ngā take Whare a Phil Twyford me ngā iwi mana whenua o Tāmaki ki te hui nei. Hei tā Rau Hoskins o te Tarahiti o Te Matapihi, he mea nui kia mōhio te Minita, he aha ngā hiahia o ngā iwi Māori o Tāmaki mō ngā whare hou ka whakatūria ki Tāmaki, arā, me hāngai ki ngā whānau tuakōkā, ko te nuinga he Māori, me whai tikanga Māori hoki i roto i te whakatū i aua whare, i roto hoki i te āhua o aua whare.
Ngā take Maina ki Puhipuhi
He hoariri hou kua toko ake hei pakanga atu mā Ngāti Hau. Katahi anō te Umanga Maina o Kānata a Full Metal Minerals Ltd ka pānui mai i te kōrero, kua whai i ngā raihana taunaha koura e rua i a Evolution Mining nō Ahitereiria, ā, ko ēra raihana e rua e hāngai ana ki te rohe o Puhipuhi i Te Tai Tokerau. mai rā anō i te ngahuru tau waru tekau, kua ātete atu a Ngāti Hau ki ngā mahi maina ki Puhipuhi, kei tāhawahawatia te wai o te rohe. Hei tā Vaughan Potter o Ngāti Hau, kaore a Evolution i whai hua ki Puhipuhi nā te whakatumatuma ā te iwi, ā, ka pērahia hoki a Full Metal Minerals.
Te Ururoa's Flavell Huarahi Hou ki Pūtauaki
Kua tapaina he huarahi hou i te rohe o Pūtauaki ki te Minita Whakawhanake Māori o mua ki a Te Ururoa’s Flavell hei tohu i tana āwhina i te rohe i te wā o te waipuke nui. Nō ngā rangi whakatā nei i whakapuarehia ai he papa kainga i te taha o te marae o Kōkōhinau mō ngā whānau i kainga kore i te Waipuke. Ā tōna wā ka tū te whā tekau whare ki taua papa kainga, ā, ko tētahi o ngā huaraki i tapaina ki te ingoa Te Ara a Te Ururoa Flavell. Nā te hapu o Pahipoto te whenua mō tēnei papa kainga i koha.
Copyright © 2018, UMA Broadcasting Ltd: www.waateanews.com