Listen Now: 
Rāhui whakangau poaka ki Hunua
E hiahia ana ngā iwi mana whenua o Tāmaki, a Ngāti Paoa me Ngāti Whanaunga ki te rāhui i te whakangau poaka ki roto i ngā pae maunga o Hunua, kei māhorahora tonu te mate e ngau ana i te kauri. Hei tā Te Hauauru Rawiri o Ngāti Paoa, ka haere te hunga whakangau poaka i tētahi ngahere ki tētahi, a, ko te māharahara ia, kei kawe rātou i te mate nei i te wao nui a Tiriwā me ētahi atu ngahere kei reira te mate nei, ki te ngahere e tipu matomato ana i ngā pae maunga Hunua.
Huri tuara ki te tono a Patuharakeke
Kua huri tuarā te Roopu Whakamana i te Tiriti ki te tono kōhukihuki a Patuharakeke e whakahē nei i ngā whiriwhiringa mō te whakataunga a Te Rūnanga o Ngāti Whātua. Hei tā Patuharakeke, iwi mana whenua i te taha tonga o Whangārei ki Mangawhai, he hononga o rātou ki a Ngāti Whātua, Ngāti Wai me Ngāpuhi. Nō tērā tau ka tono rātou kia tangohia ngā wāhanga e rua i te tono raupatu a Ngāti Whātua, engari, hei tā te Roopu Whakamana, e kao.
Te rautaki whakarauora i ngā awa o Waikato me Waipa
Kei te kimi tapae whakaaro te Kaunihera o Waikato i te hapori e pā ana ki tō rātou hiahia kia uru anō te pito raki mā whiti o te awa o Waikato ki te rautaki whakarauora i ngā awa o Waikato me Waipa. Nō te mutunga o te tau rua mano tekau mā ono ka tangohia tērā wāhanga o te awa i te rautaki, nā te mea, kaore anō rātou kia āta kōrero ki ngā iwi o Pare Hauraki. Kua kōrero rātou ki a Pare Hauraki inaianei, a, he hiahia motuhake o Pare Hauraki hei whakauru ma te Kaunihera ki te rautaki.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
