April 08, 2018
Kōwhiringa Pooti Māori
Te Kōwhiringa Pooti Māori
Mēnā e rangirua ana ō whakaaro ki ngā āhuatanga o te kōwhiringa Māori, hei tā tētahi kaitorangapū o mua a Sandra Lee, ko tēnei kaupapa he wā e taea ai e tātou te mana o te pooti Māori te whakakaha ake. Kua tae atu ngā mōkihi kōwhiringa pooti ki ngā kaipooti Māori katoa, me te kī ake, ae rānei e hiahia ana koe ki te whakawhiti i te rārangi pooti auraki ki te rārangi pooti Māori. Hei tā Lee, mā te hono ki te rārangi pooti Māori, ka kaha ake tō tātou whai mana ki roto i te whare pāremata.
Te Wāhi Pahi Tūnga Hou ki Manukau
Kua whakapuarehia te tūnga pahi hou o Manukau, me te aha, kua whai tauira Māori taua tūnga. Whā tekau mā iwa miriona tāra i pau ki te whakatū i te tūnga pahi hou nei me tōna whare hou, ā, hei tā te kahika o Tāmaki, a Phil Goff, he waahi e aro ana ki te taiao, he waahi e whakatairanga ana i te mahi toi Māori.
Te Kake Taake
Taihoa e taakehia te kōhinu. Koirā te karanga a tētahi marae i te tonga o Tāmaki ki te Kāwanatanga, i runga hoki i tō rātou māharahara kei kino te pā o taua taake ki ngā whānau pōhara. Ko te whakaaro o te Kāwanatanga kia tākehia te hunga o Tāmaki, ki te tekau hēneti ia rita kōhinu kia pai ai te whakatū ara tereina, kia pai ai hoki te whakahou ake i ngā huarahi. Hei tā Tony Kake o Papakura Marae, he uaua tēnei momo whakarite ki ngā whānau pōhara, arā, he hēneti anō kei te tangohia i o rātou pūkoro.
Te Hui Taumata Hauora
I tae atu te kotahi rau, rima tekau mātanga hauora, tākuta, neehi, tauira hauora hoki ki Rotorua i ngā rangi whakatā nei, ko tā rātou kaupapa, he aha ngā momo kōrero hei whakauru mā rātou ki te rangahau a te Roopu Whakamana e pā ana ki te rāngai hauora me ngā ratonga hauora o tēnei whenua. Ko te whainga o taua rangahau, he aha ngā take hauora tītaha e whakararuraru ana i te katoa o te iwi Māori whānui. Hei tā kaiwhakawā Stephen Clark, neke atu i te kotahi rau kereme kua tae ki a rātou, ko te hauora te pūtake o aua kereme.
Copyright © 2018, UMA Broadcasting Ltd: www.waateanews.com