March 18, 2018
Kmart ki te Whare Toatini a Ngāti Whakaue
Kmart ki te Whare Toatini a Ngāti Whakaue
Kua whakapuarehia e Ngāti Whakaue te wāhanga tuatoru o tana Whare Toatini, ā, ko tētahi o ngā toa tuatahi i roto i taua wāhanga ko Kmart. Hei tohu i tēnei kaupapa whakahirahira, i whakairotia e Paki Wilson o Ngāti Whakaue ngā pou e toru hei rapa atu ki te toa hou nei. Hei tā te Minita Whakawhanake Māori a Nanaia Mahuta, he āhuatanga nui tēnei mō Ngāti Whakaue, ā-ōhanga, ā-whakatipu hoki i te iwi.
Haere anō a SOUL ki Te Whakakotahitanga o te Ao
Kei te haere anō ngā māngai o te roopu SOUL ki mua i te aroaro o Te Whakakotahitanga o te Ao. Koinei tā rātou haerenga tuatoru ki mua i te Whakakotahitanga o te Ao ki te tohe ki te hiahia o te ūmanga o Fletchers Residential ki te whakatū i te whā rau whare ki te papa tapu o Ihumātao. Hei tā tō rātou māngai matua a Pania Newton, e haere ana rātou ko ōna hoa ki Geneva, ko te pūtake o tā rātou tohe, ko te tapu o te hītori o te whenua ka karia nei kia tū ai ēnei whare.
Hui a Te Whānau-a-Apanui ki a Andrew Little
Kua hui Te Whānau-a-Apanui ki te Minita i ngā Take Tiriti ki a Andrew Little. Ko Willie Te Aho te kaiārahi i Te Whānau-a-Apanui i roto i tā rātou whai kia whakatauria tā rātou kokoraho tiriti, ā, hei tāna, kua whakaae te Minita, otirā, te Karauna ki te hiahia o te Whānau-a-Apanui ki te whakauru i ōna takutai moana ki roto i te kokoraho.
Copyright © 2018, UMA Broadcasting Ltd: www.waateanews.com