March 12, 2018
Whai hua ngā hapū o Te Tai Tokerau ki a Northport
Whai hua ngā hapū o Te Tai Tokerau ki a Northport
E kī taurangi ana te kaiārahi i a Aotearoa Tuatahi a Winston Peters ki ngā hapū o Te Tai Tokerau, ko rātou ka whai hua i te whakahoutanga, whakawhānuitanga hoki o te wahapū ki Whangārei. Ka kīa te wahapū nei ko Northport, ēngari, kei te whakapātaritari te hapū o Patuharakeke i te kaupapa nei, he māharahara nō rātou kei tūkinohia te moana me te taiao i te wā e karia ana te papa moana kia tū ai tēnei wahapū hou. Hei tā Peters, e kore te taiao e tūkinohia rawatia, ēngari, e tika ana kia āta noho ki te kōrero ki ngā hapū mō tēnei take.
Kelvin Davis i Te Pūtake o te Riri
Ko tētahi o ngā karere wairua i puta i te rā maumahara 'Te Pūtake o te Riri' i tū ki Kororāreka i ngā rangi whakatā nei, he mea whakatītina i te hinengaro o Kelvin Davis kia maumahara ia, kotahi rau whitu tekau mā toru tau tōna tūranga Minita Paihere Karauna Māori e kukune haere ana, ā, inaianei, kua whānau mai ki te ao hei kawe māna. Hei tā Davis, no tana taenga atu ki Kororāreka mo te rā nui nei, ka hoki ōna mahara ki ngā kōrero a tana koroua ki a ia mō ngā riri whenua, me ngā tūpuna o Ngāti Manu i pakanga i taua wā rā.
Ngā wawata a Ngāti Rangi
E wawata ana a Ngāti Rangi, mā te waitohutanga o tā rātou whakaaetanga hou ki te Karauna, ka noho rātou rae ki te rae ki te Karauna ki te whiriwhiri i ngā take e hāngai pū ana ki a rātou, arā, ka kore rātou e tohutohungia noatia anō nei ko rātou te teina ko te karauna te tuakana. I waitohua e te iwi o te maunga o Ruapehu te whakaaetanga nei i ngā rangi whakatā nei, tekau mā whitu miriona tāra, te roto o Rotokura me te mana whakahaere i te awa o Whangaehu kei roto. Hei tā Che Wilson o Ngāti Rangi, i whai rātou i te moni i roto i tēnei whakaaetanga, kaore i whai i te whenua, nā te mea, kaore te Karauna i whakarite whenua haumako hei whakahoki mā rātou ki te iwi.
Copyright © 2018, UMA Broadcasting Ltd: www.waateanews.com