Listen Now: 
He Rā Maumahara ki Kororāreka
Kua tū te whakamaharatanga ōkawa tuatahi ki ngā riri whenua o konei. I whakahaerehia te kaupapa e kiia nei, ko He Rā Maumahara ki Kororāreka inanahi, te tekau mā tahi o Poututerangi, te rā i topea ai e Hone Heke te pou haki i te puke o Maiki kotahi rau, whitu tekau mā toru tau ki muri, he tohu nā Ngāpuhi ki te Pākeha, kaore rātou i te whakatutuki i ngā oati i oatihia ai e rātou i roto i te Tiriti o Waitangi. Hei tā te māngai torangapū mō Te Taitokerau me te Minita Paihere Māori Karauna a Kelvin Davis, kei te rongo tonu ngā taha e rua o ngā riri whenua o Aotearoa i te whiu o aua pakanga.
Te whakataunga tiriti a Ngāti Rangi
Kotahi rau whitu tekau mā waru tau a Ngāti Rangi e noho whakaraerae ana, nā te raupatutanga o o rātou whenua e te Karauna. Hei tā Che Wilson o Ngāti Rangi, i waitohu rātou i te Tiriti i runga i te pōhēhētanga ka rite ki te mārena, arā, ko ngā taha e rua e mahi tahi ana, e mana tahi ana hoki, mea rawa ake, ko tītaha te mārena. I waitohu a Ngāti Rangi i tā rātou whakataunga tiriti i te rā horoi nei i runga i te marae i Waiouru. Kei roto i te whakataunga nei te roto o Rotokura, te mana whakahaere i te awa o Whangaehu i te taha o te Kāwanatanga me te tekau mā whitu miriona taara.
Te kawenata tauhokohoko CPTPP
Kei te māharahara tonu te tokomaha o ngā Māori ki ngā pānga mai o te kawenata tauhokohoko CPTPP. Hei tā Willie Te Aho, roia Māori, e rua ngā wā kua pooti whakahē te Kāhui Rangatira-a-Iwi ki tēnei kawenata. Hei tāna, kaore anō ngā mōtika o te iwi Māori, otirā o ngā hapu Māori kia āta whiriwhirihia i raro i taua kawenata, kia pūmau tonu ai ō tātou mana i raro i Te Tiriti o Waitangi.
Whakataetae kapahaka-ā-rohe o Rangitāne me Ahitereiria
I tū ngā whakataetae kapa haka o Rangitāne me Ahitereiria i ngā rangi whakatā nei. Ko Te Tū Mataora te kapa whakaihuwaka o Rangitāne, ā, ko rāua ko Te Tini o Rehua ka haere ki te Matatini a tēra tau. Whakawhiti atu i te moana tāpokopoko a Tāwhaki ki te whenua o te Iwi Moemoeā, ko Manawa Mai Tawhiti i toa, ko Te Hoe ki Matangireia i tuarua.
Rāhuitia te keri hinu
He Māori rongonui ētahi kua tuku reta tūmatanui ki te peremia ki a Jacinda Ardern e whakahau ana i a ia kia rāhuitia te keri hinu, keri kāpuni ki tēnei whenua. Hei tā te tāhūhū rangapū o Greenpeace Aotearoa a Russel Norman, me whakatinana a Ardern i āna oati i oatihia ai e ia i te wā o te kōwhiringa pooti.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
