March 04, 2018
Jacinda Ardern ki Te Moana Nui-a-Kiwa
Jacinda Ardern ki Te Moana Nui-ā-Kiwa
Kei te whātoro atu te Pirīmia a Jacinda Ardern ki te Moana Nui ā Kiwa ki reira whakapā atu ai ki ngā rangatira ā moutere. Ka tūtaki atu ia ki ngā kaiārahi a Niue Hāmoa Tonga me Rarotonga, ā, e whai ana i ngā tapuwae o John Key rāua ko Bill English ki te whakararata i ngā rangatira huri noa. Ki tā Ardern he nui ngā kaupapa kei mua i a Pasifika pērā i te huringa o te āhuarangi, te mahinga o ngā rawa whenua o ngā rawa moana, me te whakakotahitanga o te ao kia noho kōpapa katoa tātou.
Simon Bridges rangatira hou o Nāhinara
I ahu mai koe i hea, nō tēhea iwi? Koia tētahi kōrero e karapoti ana i a Simon Bridges rangatira hou o Nāhinara, ahakoa te mōhio he uri nō Ngāti Maniapoto. Kua werohia a Bridges e ētahi kaikōrero kaore ia e aronui ana ki tana taha rangatira. I runga i aua whakapae hai tāna, ko te tumanako kia heke mai te aroha o te Māori ki a ia me te ngākau whakahīhī. Kāti i tupu ake ia i te uru o Tāmaki me ōna tūākana e rima.
Te tatauranga o te motu
Kia kaha ake te Māori ki te whai waahi ki te tatauranga o te motu arā ki te census. Koia te akiaki a Mārama Fox o te RTM me tana kī mehemea ki te uru atu tātou ki taua kaupapa rangahau, ka taka mai ngā hua ki a tātou hai painga mō tātou a ngā tau kei te heke mai. Ki a ia anō ko te tikanga kia whakamōhio atu tātou ki te tari tatauranga ngā momo rarauranga kia taea ai te tohatoha i ngā rawa āwhina ki te ao Māori kia whakatahuri i ngā kaute kino o te wā.
Kua hinga a Alfred Bunty Preece
Kua hinga he tōtara o te wao nui a Tāne, arā ko tētahi o ngā mōrehu o te roopu 28 a Alfred Bunty Preece 96 ōna tau. I tū tana tangihanga inanahi i Wharekauri, nō tērā moutere te kaumātua raka. He tūao i uru atu ki a kamupene D ka roa ka roa ka piki ki te tūranga hai āpiha i ngā rā o te pakanga tuarua o te ao. Ko tā Preece i ōna rā, i tutuki i a ia te nuinga o ōna wawata. Nō reira e te matua e te rangatira takoto mai takoto mai moe mai rā.
Hui a Ngāpuhi me Andrew Little
E anga whakamua ana ngā kōrero a Ngāpuhi whai muri te tūtakitanga atu ki a Minita Take Tiriti o Waitangi ki a Andrew Little i ngā rā whakatā pahure atu nei. Hei tā Little tino whai hua ngā kōrero i waenga i ngā roopu whai mana o te iwi, otirā i a Tūhoronuku me te Kotahitanga. Ka hoki ngā taha e rua ki o rātou kaitautoko ki te matapaki i ngā whakawhitinga kupu kua meatia nei, hai tā Little anō, ko te whāinga tonu kia tatū ki tētahi whakataunga kua roa e whakatauhia ana.
Copyright © 2018, UMA Broadcasting Ltd: www.waateanews.com