February 21, 2018
Rāhui i ngā pae maunga ō Waitākere
Rāhui i ngā pae maunga o Waitākere
Hei tā tētahi mātanga taiao, a Nick Waipara, he mea nui kia whakamana rāhui te Kaunihera o Tāmaki, puta noa i ngā pae maunga o Waitākere, otirā, te Wao nui a Tiriwā, kia pai ai te whawhai atu ki te mate kauri. Hei tāna, he mea nui kia tautoko te Kaunihera i te karanga a Te Kawerau a Maki i ngā marama nei, kia kaua te hunga o te hapori e takahi haere i ngā ara hīkoi o taua ngahere.
Tū he ara tereina ki te wahapū o Te Tai Tokerau
Ko tētahi o ngā whainga matua o tēnei Kāwanatanga kia tū he ara tereina ki te wahapū o Te Tai Tokerau. Kua whakaae te Rūnanga Minita o te Kāwanatanga ki te toru piriona tāra hei whakawhanake i ngā āhuatanga ki ngā rohe, ā, ko tētahi o a rātou oati ki a Aotearoa Tuatahi, kotahi piriona tāra o tēra pūtea ka haere ki te ara tereina nei, hei whakaea i te wawata o Winston Peters. Hei tā Winston Peters, kua roa rawa ngā Kāwanatanga e whakapau pūtea nui ana ki Tāmaki, kua tae ki te wā, me whakapau pūtea ki ngā rohe kia whanake ai ngā hapori o reira.
Copyright © 2018, UMA Broadcasting Ltd: www.waateanews.com