Listen Now: 
Kaiārahi hou mō Nahinara
Kei te rere te kōrero ka whiu a Mark Mitchell, Minita o mua i ngā Take Ārai, i tōna ingoa ki waenganui i ēra atu e whakataetae ana i te tūranga kaiārahi i a Nahinara. Ehara i te mea, he rongonui a Mitchell, ēngari, e ai ki ngā kōrero, tokomaha ngā tāngata o Nahinara e rata ana ki a ia, e tautoko ana i a ia. Ko Simon Brdges, Amy Adams me Judith Collins ēra atu e whai ana kia tū hei kaiārahi hou i a Nahinara.
Pā mai a Huripari Gita i Aotearoa
E hītengitengi haere ana a Huripari Gita i ngā tihi ngaru o te moana tāpokopoko a Tāwhaki i tēnei wā, ā, ka tae ia ki te Tauihu o te waka me te Tai o Poutini āpōpō. Hei tā te Ratonga Huarere o te motu, kaore te nuinga o ngā rohe o te hiku me te puku o te ika e karawhiua e taua huripari, ēngari anō te ūpoko, te tauihu me te uru o Te Waipounamu, kia mau.
Te hui ma ngā pakihi Māori
Hei tā te Minita Whakawhanake Māori a Nanaia Mahuta, ahakoa he mea nui ngā pakihi-ā-iwi, me kaua e wareware ki ngā pakihi-ā-whānau. Nā Mahuta te hui mā ngā pakihi Māori i whakapuare i Tauranga i ngā rangi whakatā nei, ā, hei taana, mā te whakapakari i ngā hononga ki waenganui i te Kāwanatanga me ngā pakihi Māori ka tipu matomato tonu te ōhanga Māori. Hei tāna, ko ngā pakihi-ā-whānau te tūāpapa o taua ōhanga.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2018, UMA Broadcasting Ltd: www.waateanews.com
RELATED NEWS
