February 12, 2018
Hīkoi hei whakahē kia kati ngā kura hourua
Hikoi hei whakahē kia kati ngā kura hourua
Tōna kotahi rau tauira kura hourua mē te hunga tautoko i aua kura i hīkoi i te huarahi o Kuini i ngā rangi whakatā nei, ahakoa te ua marangai, ki te whakahē i te whakatau a te Kāwanatanga kia katia ngā kura hourua. Nō te wiki nei te Minita i ngā take Mātauranga a Chris Hipkins i kōkiri ai i te pire e katia ai ngā kura hourua. Nā te kaiārahi i a ACT, nā David Seymour, te hikoi nei i ārahi. Hei tā te Minita Whakawhanake Māori o mua a Te Ururoa Flavell, he hua kei te puta i ngā kura hourua.
Pukapuka hou a Brad Haami
Kua puta te pukapuka hou a Brad Haami nō Ngāti Awa, ko Urban Māori: The Second Great Migration te ingoa. Hei tāna, e hāngai ana tēnei pukapuka ki ngā whānau Māori i whakarere i o rātou tūrangawaewae me o rātou iwi ki te kimi mahi i ngā whaitua nui, nā wai rā, ka whakatū "iwi taone" hei whakatutuki i o rātou tumanako mō ngā whakatipuranga Māori e noho taone ana.
Hui International Gambling Conference
He hononga motuhake i waenganui i ngā mīhini petipeti me te pōharatanga. Koirā tā te tākuta hauora nō Kaitaia tā Lance O’Sullivan. Koia tētahi ō ngā kaikōrero matua ki te hui International Gambling Conference ka tū ki Tāmaki i te rā nei, ā, hei tāna, ko te kiriwaratanga o ētahi ki ngā mīhini petipeti te pūtake o te pōharatanga ō o rātou whānau, otirā, o te ngoikoretanga o te hauora o ngā tamariki o aua whānau.
Te tuhinga kaikiri a Tā Robert Jones
I whakawhiti ia i te tuku kōrero hei kai mā te hinengaro, ki te tuku kōrero kaikiri. Koirā tā te kaumātua o te waka o Mataatua tā Maanu Paul, whai muri iho i te tuhinga kaikiri a Tā Robert Jones e pā ana ki te Māori. Kua whakatere petihana a Renae Maihi, kaihanga kiriata, e tangohia ai te tohu tā a Jones, ā, whā tekau mano tāngata kua waitohu i taua petihana. Hei tā Paul, ko Jones tētahi e hoe taiki ana i te waka kaikiri o tēnei whenua.
Copyright © 2018, UMA Broadcasting Ltd: www.waateanews.com