February 01, 2018
Pīataata ngā rama i te arahanga o Tāmaki
Pīataata ngā rama i te arahanga o Tāmaki
Mēnā ka kite rama koe e pīataata ana i te arahanga o Tāmaki hei ēnei rangi whakatā nei, koirā ngā rama ā te iwi o Mahurangi a Ngāti Manuhiri. Hei tā Mook Hohneck o Ngāti Manuhiri, nā rāua ko Colin MacDonald o Ngāti Rehua te āhua o ngā rama nei i whakarite hei tohu i te hītori o Ngāti Manuhiri, ā, nā Vector me te Kaunihera o Tāmaki i tautoko. E whitu meneti te roa o tēnei whakaaturanga rama nei, ā, ka tīmata a te iwa karaka a te pō nei, katahi ka pīatataa anō ia haora tae atu ki te rā o Waitangi.
Haere a Ardern ki Waitangi
E haere ana au ki Waitangi, me te ngākau māhaki, te hinengaro tūwhera. Koirā tā te peremia, tā Jacinda Ardern. He maha āna hui ki roto o Waitangi i te rā nei, tae atu ki te rā o Waitangi a te rātū. Hei tāna, e rikarika ana ia ki te kōrero ki ngā roopu pēnei i te Kāhui Rangatira-ā-Iwi, Ngā Wātene Māori me te Roopu Wāhine Māori Toko i te Ora, kanohi ki te kanohi.
Te tūru o Maungakiekie
E hiahia ana te māngai mō Reipa e tū ana ki te kōwhiringa pooti motuhake ki te tūru o Maungakiekie kia tirohia anō te whakaaetanga i hoko whenua tāpui ai a Ngāti Paoa i Point England. Ko Josephine Bartley te toihau o te Poari Hapori o Maungakiekie, a, Hei tāna, i makihohoro te Kāwanatanga o mua, arā, a Nāhinara ki te whakaoti wawe i taua whakaaetanga.
Ngā whakatūpato mo te wai
Ko te whakahaere akoranga kauhoe ki roto i ngā kura, me te whakatairanga i ngā whakatūpato mō te wai. Koirā ngā whainga matua a Haumaru Wai Aotearoa e heke ai te nui e toromi ana. E waru tekau mā waru tāngata i toromi i tēra tau, he pikinga tekau mā toru ōrau i te tau i mua atu. Hei tā te tāhūhū rangapū o Haumaru Wai, a Jonty Mills, ahakoa i piki te tatauranga mō te tokomaha i toromi i tēra tau, i heke te tatauranga mō ngā Māori i toromi, mā te tekau mā whitu oorau.
Copyright © 2018, UMA Broadcasting Ltd: www.waateanews.com