Te rā o Rangiriri pā

Te rā o Rangiriri pā

Neke atu i te rima tekau tau te pakanga ki Rangiriri e arokorehia ana e te hunga hautū waka, heoi, nō ngā rangi whakatā nei, i ōkawa ai te whakatuwheratanga o te huarahi matua hou e haere ana mā Rangiriri, e te Minita Kōtui Karauna Māori, e Kelvin Davis, mē te aha, kua whakahouhia te pā o Rangiriri, ā, kua whakatūria ētahi pou kia mohio ai te marea ki ngā kōrero mo te pakanga nui i tū ki Rangiriri i te taha o te awa o Waikato. I ngā wā o mua, i haere te huarahi mā waenganui i te pā, inaianei ka haere mā te taha o te pā, ā, hei tā te māngai mō Waikato-Tainui a Rukumoana Schaafhausen, i mahi tahi te iwi me Ikiiki Whenua ki te hāpai anō i te mana o te pā ō Rangiriri me ōna kōrero i roto i tēnei kaupapa.

He mahi hou mā Flavell

Tērā pea kua kite mahi hou te Minita Whakawhanake Māori o mua, a Te Ururoa Flavell māna hei ringa kōtuitui i ngā pakihi Māori. Kei te kimi mahi tonu a Flavell whai muri iho i te mūhoretanga o te RTM i te kōwhiringa pooti i tēnei tau, ā, hei tāna, tēra pea ko tētahi huarahi hei taunaha māna, ko te whakatū i tētahi kaupapa hei rangitāmiro i ngā pakihi Māori ki ngā pakihi nui o te motu. Hei tāna, kua tono ētahi Whare Wānanga ki a ia kia whakaako ia i tērā momo kaupapa tae atu ki te mātauranga tōrangapū.

Mihi a Te Pou Matakana ki te Kāwanatanga

E mihi ana tētahi o ngā māngai matua o te kaupapa whānau ora ki te Kāwanatanga, mō tā rātou hōtaka hou hei tautoko i ngā whānau. Hei tā Merepeka Raukawa Tait, ūpoko o te poari o Te Pou Matakana, e harikoa ana ia kua tahuri te Kāwanatanga hou ki te tautoko i ngā whānau ma roto atu i tā rātou hōtaka Best Start. Ko te ngako o taua hōtaka, ko te ono tekau tāra ia wiki hei tautoko i ngā whānau kua whai pēpi hou, kotahi tau te roa o tēra koha ki aua whānau. Tae atu ki te Pūtea Takurua ka pau ki te whakamahana i ngā whare o ngā whānau pōhara.

Kaupapa whai mahi te hunga rangatahi

E uruhau ana te ngākau o te Minita Whakawhanake Rohe, arā, o Shane Jones i te tini o ngā mihi kua tae atu ki a ia mo tāna kaupapa e haere ai te hunga rangatahi ki te mahi, otirā, ki te whakatō i te kotahi piriona rākau hou, kia whai tonu ai rātou i te penihana. I te wā i puta tuatahi mai ai tēnei kaupapa i a Jones, ka nui te tātāhia, engari, kua āta noho rāua ko te Minita Whai Mahi a Willie Jackson ki te whakarautaki i tēnei kaupapa, ā, tino kore rawa atu nei ēnei rangatahi nei e utua ki te utu kino mō tēnei mahi ā rātou, engari, ka whai utu pai.

Marama Royal ūpoko o Ngāti Whātua Ōrākei

Kua pōtihia a Marama Royal hei ūpoko o te Poari o Ngāti Whātua Ōrākei. Koia ka kawe i te tūranga kua mahue nei i a Phillip Davis. Mai rā anō i te tau rua mano tekau kua noho a Royal hei taratī o te Poari, ā, nō te tau rua mano tekau mā rima ka whakaūngia ia hei ūpoko tuarua. Hei tāna, ka aronui ia ki ngā hapori o Ōrākei, a, ka whakatū ia i tōna tari ki te marae o Ōrākei. I tēnei wā, paku neke atu i te kotahi pirona tāra te uara o ngā rawa a Ngāti Whātua Ōrākei. I pootihia a Ngarimu Blair hei upoko tuarua.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Prime mātauranga Māori exponent dies in Utah Crime summit too soft for Korako Windfall for Maori law research