Listen Now: 
December 07, 2017
Porotū ngā kaimahi me ngā kaihautū tereina
Waatea Team
Posted On December 7, 2017
Porotū ngā kaimahi me ngā kaihautū tereina
Kei te porotū ngā kaimahi me ngā kaihautū tereina ki roto o Tāmaki Makaurau i te rā nei. Ko te whakapae ia, e toru tekau mā rima mano tāngata ka raru i tēnei ātetetanga, mē te aha, ka muia ngā huarahi. Ko te take e porotū nei, nā te mea, kaore rātou i te whakaae ki te whakaaro kia noho ko te kaihautū anake ki runga i te tereina, arā, kaore he kaitiaki, he kaimahi anō hei ārahi i ngā pāhihi, hei whakatau raru.
Christmas at the Pā ki Te Puea Marae
Hei te pō āpōpō ka tū he ngahau kirihimete ki te marae o Te Puea i Māngere. Ko Christmas at the Pa te ingoa o te ngahau nei, he kapa haka, he kai, he waiata te kaupapa. Hei tā tētahi o ngā kaitūao o te Marae, a Johnboi Kukutai, he koha tēnei na te marae ki te hāpori hei mihi mā te marae i te hāpori mo tā rātou tautoko i te marae i te tau nei. He wā anō tēnei e kite anō ai te marae i te hunga me ngā whānau kāinga kore, nā rātou nei i āwhina i te tau nei. Ka tīmata te ngahau nei hei te toru karaka a te ahiahi nei, ā, ka mutu hei te iwa.
Karahipi mo te tohu tāpuhi
Kotahi o roto i te rima tauira e whai ana i te tohu tāpuhi i te tonga o Tāmaki, he Māori, ā, nā te kaupapa mahi tahi i waenganui i te Rātonga Hauora o Counties Manukau, te Tūāpapa Tindall me te Kura Aronui o Tāmaki i pēna ai. I hangaia e rātou he karahipi kia tokomaha ai ngā tāpuhi Māori, ko Pū Ora Matatini te ingoa, ā, kua whakawhiwhia a Camille Harris, Carleen Paterson, Natasha Paul me Maia Wharekura ki aua karahipi hei tohu o tō rātou angitū i roto i tā rātou whai i ngā mahi tāpuhi. No te tau rua mano tekau mā rima i whakatūria ai te karahipi nei.
Waihanga tūranga mahi te Kāwanatanga
Hei tā te peremia a Jacinda Ardern, ko te whainga a te Kāwanatanga kia waihanga tūranga mahi, kaua ki te waihanga kaupapa mahi. Kua tino tātāhia te Minita Whakawhanake Rohe a Shane Jones i te wiki nei, mo tāna kī i kī ake rā ia, me mahi te tangata mo te pēnihana. Hei tā Ardern, kaore rātou i te whai i te tauira a Nāhinara i te ngahuru tau iwa tekau, arā, kei te hiahia kē rātou ki te waihanga tūranga mahi mē te utu i te tangata ki te utu tika mo tāua mahi.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
