Ngā muramuratanga o Hinemahuika ki Tokoroa

Ngā muramuratanga o Hinemahuika ki Tokoroa

Neke atu i te toru tekau mā rima kaipatu ahi i pakanga ki ngā muramuratanga o Hinemahuika i te roanga o te ata pongipongi nei, i te huarahi o Belmoral i Tokoroa i te tonga o Waikato. E ai ki ngā kōrero, i whitawhita ake te ahi i tētahi o ngā umanga poro rākau o te takiwa. Kei taua waahi tonu ngā kaipatu ahi e tineinei haere ana i ngā pungarehu kia kore ai te ahi e pūkauri ake anō. Kua tae atu hoki ngā mātanga ki te rangahau, nā te aha taua ahi i tīmata ai.

Te Matatini 2019

Kua kitea he papa whenua e tū ai te Matatini hei te tau rua mano tekau mā iwa ki roto i Te Whanganui-ā-Tara, arā, ko Westpac Trust Stadium. Hei tā te heamana o Te Matatini a Selwyn Parata, e haere ana ngā tereina me ngā pahi ki reira, ā, he māmā hoki te kuhutanga atu o te marea ki roto ki te mātakitaki, arā, toru tekau mā whā mano ka whai waahi ki roto.

Karahipi Māori i te Whare Wānanga o Wikitōria

Kei te kōkiri karahipi Māori te Whare Wānanga o Wikitōria. Hei tā Ahorangi Rawinia Higgins, i tōna tikanga kia kotahi mano tauira Māori ki te Wānanga, engari, kaore i te eke ki tēra nui i tēnei wā. Hei tāna, ma ēnei karahipi nei, ka tokomaha ake ngā tauira Māori ki te Wānanga. Hei te pō nei ka tū te hui Te Tini o Rehua ki te Whare Wānanga hei whakanui i te angitū o ngā tauira Māori o te wā.

Tā Harawira Gardiner mo te Rūnanga o Ngāti Maniapoto

Kua tahuri te Rūnanga o Ngāti Maniapoto ki a Tā Harawira Gardiner ki te āwhina i a rātou ki te whakatutuki i tā rātou tono raupatu. Tokorua ngā kaikōkiri i te tono kua heke iho, arā, ko Nanaia Mahuta rāua ko Peter Douglas. Kotahi rau, rima tekau miriona tāra te uara o te whakataunga i whakaritea ai e rāua i mua i tā rāua heke iho i o rāua tūranga. Hei tā te Ūpoko o te Rūnanga a Tiwha Bell, ka mahi tahi a Tā Harawira rāua ko te kaikōkiri e toe ana, a Mook Hohneck, kia tutuki ai te whakataunga.

Ngā rawa a Ngāti Whātua Ōrākei

Kua whanake te uara o ngā rawa a Ngāti Whātua Ōrākei mā te tekau mā ono ōrau i te tau pūtea nei, nō reira, kotahi piriona tāra te uara o ngā rawa a te iwi inaianei. Hei tā Phillip Davis, heamana o Ngāti Whātua Ōrākei, ma te pakaritanga o te pūtea a te iwi, ka tutuki ētahi o o rātou moemoeā, pēra i te āwhina i ngā uri ki te hoko whare.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Education innovation rewarded Maori miss out on Internet promise Maori Party sells access to PM