Listen Now: 
Rāhui ki runga i te ngahere o Waitakere
Kua utaina atu e Te Kawerau a Maki he rāhui ki runga i te ngahere o Waitākere, mei kore e tūpono mā reira ka korehāhā te mate e patu ana i ngā kauri o te ngahere rā. Kua rāhuitia te tangata i te rua mano rima rau heketea o taua ngahere, ā, hei tā Nick Waipara, mātanga putaiao, kaore anō rātou kia kite rongoā mo te mate kauri i tēnei wā nei, nō reira, he mea tika tēnei rāhui, i te mea, e ai ki ngā kōrero waru tekau ōrau o te hunga ka kuhu ki taua ngahere, kaore i te horoi i o rātou hū. Hei te rā nei, ka whiriwhiri te Kaunihera o Tāmaki, mena ka tautoko rātou i te rāhui.
$4.7 miriona te Tarahiti o Tūwharetoa
Whā ira kati whitu miriona tāra te pūtea hemihemi a te Tarahiti o Tūwharetoa i tēnei tau, ā, nā te pai o te pūtea nei, ka whakatū anō te Tarahiti i ētahi karahipi mātauranga, ā, ka tohatoha pūtea hoki ki ngā marae. Hei tā te Toihau o te Tarahiti, a Rakeipoho Taiaroa, i ngā tau e whā nei kua piki te uara o te Tarahiti i te tekau mā ono miriona ki te toru tekau mā whitu miriona.
Mutu te mahi whakapahū papa moana
I hui te Kāhui Rangatira-ā-iwi i ngā rā tata nei, ā, kei te karanga rātou kia mutu te mahi whakapahū papa moana ki te tūhura hinu. Kei te moana ki waho o Taranaki te kaipuke Amazon Warrior mo te toru marama e whakapahū ana i te papa moana, ahakoa koirā te kainga o ngā tohora me ngā aihe. I whakaae te katoa o te Kāhui Rangatira-ā-iwi ki te whakahē i taua mahi, me te whakamōhio atu ki te Kāwanatanga, kaore i te pai ki a rātou.
Kaupapa whakatū whare Kiwibuild
Kua whakarewahia e te Minita i ngā Take Whare, e Phil Twyford tāna kaupapa whakatū whare, ko Kiwibuild te ingoa, ā, e whakapono ana ia ka puta he hua i taua kaupapa ki ngā whānau Māori e kimi whare ana mō rātou. Hei tāna, no te katinga o Te Manatū Take Māori i te ngahuru tau waru tekau, ka heke haere ngā tatauranga mo te nui o ngā whānau Māori nō rātou anō ō rātou whare. Hei tā Twyford, kei te mahi tahi rāua ko te Minita Whakawhanake Māori a Nanaia Mahuta kia tū ai he wāhanga Māori ki te kaupapa Kiwibuild, ā, tēra pea ka whai waahi hoki ngā iwi ki taua wāhanga.
Hoko whenua a Ngāti Whātua Ōrākei
Ka kōrero a Ngāti Whātua Ōrakei ki ōna karangatanga hapu, me aha ngā whenua katahi anō ka hokona e rātou i te huarahi o Kupe, tata ana ki Ōrākei Marae. Na te ringa pakihi o Ngāti Whātua, arā, nā Whai Rawa taua whenua i hoko i te Kaporeihana Whare o Aotearoa, mo te tekau mā ono miriona tāra. Hei tā Ngarimu Blair o Whai Rawa, ko te whainga ia kia hokona te katoa o ngā whenua i tangohia ai i a rātou i Ōrākei.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
RELATED NEWS
