November 27, 2017
Whakahē a Ngāti Whātua ki te whakatū huarahi hou
Whakahē a Ngāti Whātua ki te whakatū huarahi hou
Kei te karanga a Ngāti Whātua Ōrākei kia kaua te Kāwanatanga e tautoko i te huarahi hou ka hangaia ki te rā whiti mā uru o Tāmaki. Hei tā Ngarimu Blair o Ngāti Whātua, ki te hanga taua huarahi, he maha ngā waahi tapu o te iwi me ngā waahi taiao ka tūkinohia.
Ngā amuamu mō te whakamahi i te reo Māori
He maha ngā amuamu e haere ana ki te Reo Irirangi o Aotearoa i tēnei wā mō te kaha o ā rātou kaiwhakapāho pēra i a Guyon Espiner ki te whakamahi i te reo Māori, ā, hei taa te Kaikomihana-a-Iwi a Kahurangi Susan Devoy, he tohu aua amuamu o te māhorahoratanga o te reo Māori ki te tini o ngā tāngata o tēnei whenua. Hei tāna, tokomaha ngā tāngata e rongo ana i te reo i ēnei rā, otirā, tokomaha hoki e whakahē ana i ngā momo amuamu mō te reo, pēra i te tuhinga i roto i te Niupepa o Ōtākou.
Te whakahoutanga o te ture whenua Māori
Kei te kimi te Minita Whakawhanake Māori a Nanaia Mahuta i ētahi rautaki hou hei āwhina i ngā kaipupuri whenua Māori ki te whakawhanake i ō rātou whenua. Kua whakatahangia e ia, otirā e te Kāwanatanga hou te whakahoutanga o te ture whenua Māori, i te kōkirihia e te Minita ō mua e Te Ururoa Flavell, nā te mea, hei tā Mahuta, he maha rawa ngā hapa o taua whakahoutanga.
Ngā waka kawe tāngata o te rohe o Tāhuna
Kei te whakamahi taupānga te umanga pahi a Ngāi Tahu, arā, a GoBus kia pai ai te mahi tahi ā ngā waka kawe tāngata o te rohe o Tāhuna. Hei tā Calum Haslop, kaiwhakahaere i a Go Bus, kei te whakamātautau noa iho rātou i tēnei taupānga kia kite ai menā rā ka whai hua i roto o Tāhuna. E rima tāra te utu mo te taupānga nei, ā, kei ā koe te tikanga menā rā ka kōwhiri pahi, tekehī, aha rānei hei kawe i a koe i tētahi wāhi ki tētahi.
Copyright © 2017, UMA Broadcasting Ltd: www.waateanews.com