November 23, 2017
Ngā whakataunga tiriti
Ngā whakataunga tiriti
Kei te werohia ngā rōia Māori kia whai whakaaro nui ki ngā Māori o ia rā, i a rātou e whiriwhiri ana i ngā whakataunga tiriti ā ngā iwi me te āpōpōtanga o aua whakataunga. Toru rau rōia Māori i tae-ā-tinana ki te hui a Te Hunga Rōia Māori o Aotearoa i Tāmaki i ngā rangi whakatā nei, ā, hei tā Kylie Quince, kaiako ture i te Kura Aronui, na kaiwhakawā Joe Williams rātou i wero, ehara te whakatutukihanga o ngā whakataunga i te mea nui, engari, ko te manaaki i ngā uri o aua whakataunga.
Whakapakari taumata kōrero o Waikato Tainui
Kua whakatūria he roopu hei whakapakari i ngā taumata kōrero i runga i ngā marae o Waikato Tainui. I whakahaere wānanga te roopu Ngā Marae Toopu i Taupiri i ngā rangi whakatā nei, ki te tūhura i ngā pū kōrero me ngā kaiārahi o tēna marae, o tēna marae i ngā rā o āpōpō. Hei tā Brad Totorewa, māngai mo te roopu nei, i ngā wā o mua, ka whitu tekau pea ngā tau o te hunga whaikōrero i runga i ngā marae, engari, i ēnei rā, ka mahia taua mahi e te hunga e toru, e whā tekau rānei nga tau.
Tokomaha ake ngā kaimahi Māori ki Heartland Bank
E hiahia ana te whare tāhua o Heartland Bank kia tokomaha ake āna kaimahi Māori. Hei tā te tāhūhū rangapū a Jeff Greenslade, toru rau, ono tekau ngā kaimahi o te whare tāhua, engari, tokoiti rātou he Māori. Hei tāna, he rautaki tā rātou e huri ai te Māori ki te mahi mā rātou.
Copyright © 2017, UMA Broadcasting Ltd: www.waateanews.com