Listen Now: 
Hui ki ngā kaitorangapū Māori o Reipa
I tae atu ētahi o ngā tino rangatira o te ao Māori ki te hui ki ngā kaitorangapū Māori o Reipa inanahi, pēnei i te perehitini o te Roopu Wāhine Māori Toko i te Ora, a Prue Kapua, Toihau o Te Pou Matakana a Merepeka Raukawa Tait, Tāhūhū rangapū o Waikato-Tainui a Donna Flavell, tae atu ki te mātanga rōia rā, ki a Moana Jackson. Ko te tikanga o te hui, he wānanga i ngā kaupapa e hāngai pū ana ki te Māori.
Whakamāmā i ngā tikanga o ngā marae o Waikato Tainui
Kei te whakamāmā i ngā tikanga kia ora ai ngā tikanga. Koira tā te roopu Ngā Marae Toopu, he roopu e ngana ana ki te whakawhanake i ngā pū kōrero o āpōpō kia noho ai rātou ki runga i ngā paepae o ngā marae o Waikato Tainui. I whakahaere hui rātou i Taupiri i ngā rā tata nei, ā, hei tā Brad Totorewa, māngai mo te roopu, e whai whakaaro ana rātou ki te turaki i ngā tikanga e kī ana, kaua te teina e tū ki mua i te tūākana, kaua te tama e tū ki mua i tōna pāpā.
Lisa Tumahai Kaiwhakahaere hou o Te Rūnanga o Ngāi Tahu
Kua kopoua e Te Rūnanga o Ngāi Tahu a Lisa Tumahai hei kaiwhakahaere hou mō rātou. Ko Matapura Ellison o te Rūnanga o Kati Huirapa Rūnaka tana tuarua. He mea pooti rāua i te hui a te Rūnanga i Tuahiwi Marae inanahi. Ka tīmata te hui-ā-tau a Ngāi Tahu ki taua marae i te rā nei, ā, ka haere tonu tae atu ki te rā tapu.
Jason Pou Heamana Takirua Community Law Centres
Kua whakaūngia a Jason Pou, rōia no Rotorua ki te tūranga o te heamana takirua i te roopu Community Law Centres o Aotearoa. Hei tā te tāhūhū rangapū a Liz Tennet, kua whai pūtea hou rātou i te Kāwanatanga hou, ā, ka riro mā Pou rātou e ārahi kia pakari ake ai tā rātou tū i roto i ngā tau o āpōpō.
!["p_facebook"]("/site/uma/images/story_img/facebook.jpg")
& !["p_twitter"]("/site/uma/images/story_img/twitter.jpg")
Copyright © 2017, UMA Broadcasting Ltd: www.waateanews.com
