November 19, 2017
He wānanga MWDI ko HineBoss
He wānanga MWDI ko HineBoss
Me pēhea te hāpai me te mairanga i ngā angitūtanga. Koirā tētahi o ngā kaupapa ka āta kōrerotia i roto i te wānanaga e toru rā te roa, e whakahaerehia ana e Te Maori Women’s Development Incorporation hei tēnei wiki nei. Ko Moana Tamaariki-Pohe, tētahi o ngā kaihautū i te wānanga e kiia nei, ko HineBoss, a, hāunga anō rā ngā momo mātauranga pakihi, ka matapakihia hoki ngā āhuatanga o tā te wahine tiaki i te whānau me te tiaki i ōna moemoeā i roto i te ao mahi. Hei tāna, i ētahi wā, ka riro mā ngā waiaro te pikinga o ngā wāhine Māori ki te taumata, e whakahōtaetae.
Te hui a Ngāpuhi mo ngā take tiriti
Me whai whakaaro te Minita hou i ngā take Tiriti, a Andrew Little, me pēhea tana whakapakari ake i a Tuhoronuku, hei aha te whai whakaaro ki te whakahaere tikanga pooti anō, hei whiriwhiri mena rā kei a Tuhoronuku tonu te tautoko a te iwi. Koira tā te Toihau o Tuhoronuku, tā Hone Sadler. I hui a Andrew Little rāua ko te Minita Whakawhanake Māori a Nanaia Mahuta ki a Tuhoronuku me Te Kotahitanga i ngā rangi whakatā nei. Hei tā Sadler, me tūpato a Little, kei puta i a ia ētahi kōrero mo te whakataunga tiriti a Ngāpuhi kaore e taea e ia te whakatinana.
E rua ngā mema hou o te roopu Te Apārangi
Kua whakaurua te mātanga toi a Michael Parekowhai rāua ko Ahorangi Margaret Mutu ki te roopu Te Apārangi, arā, te Royal Society. Tekau mā ono ngā kairangahau, ngā mātanga rānei kua whakaurua ki taua roopu mo te wā tuatahi. Hei tā Barry Scott, māngai mo te roopu Te Apārangi, e uru ai ki te roopu, me mātua kite rātou i te hōhonutanga o te mōhio o te tangata, me mātua puta hoki i taua tangata he mātauranga hou hei āwhina i ngā hapori.
Rahui Papa mo ngā tono raupatu a Waikato Tainui
Kua whakatūria a Rahui Papa hei kaikōkiri i ngā tono raupatu a Waikato Tainui kaore anō kia whakatauhia. Hei tā Parekāwhia McLean, ūpoko o Te Whakakitenga o Waikato, i āta wānanga rātou i tēnei tūranga i mua i te tukutanga atu ki a Papa. Hei tāna, e tautohito ana a Papa i roto i ngā mahi whakatau kereme, nā te mea, nāna a Ngāti Koroki Kahukura i ārahi kia tutuki ai tā rātou.
Whakatū tūru Māori ki Manawatū
Kua whakaae te Kaunihera o Manawatū ki te whakatū tūru Māori motuhake ki waenganui i a rātou. E whai ana tēnei whakatau a Manawatū i te hāpaitanga o te Kaunihera o Whakatāne i te whakaaro kia whakatū tūru Māori motuhake rātou. Hei tā te kahika o Manawatū a Helen Worboys, kua roa rātou e whiriwhiri tahi ana me te iwi Māori, ā, i te tau iwa tekau mā rua i whakatūria ai te roopu Ngā Manu Taikō, hei tohutohu i te Kaunihera.
Copyright © 2017, UMA Broadcasting Ltd: www.waateanews.com