Ngā kōrero a Chris Finlayson mo Sonny Tau

Ngā kōrero a Chris Finlayson mo Sonny Tau

Kua rere ētahi kupu hahani e hāngai pū ana ki a Sonny Tau o Ngāpuhi. Hei tā te Minita o mua i ngā Take Tiriti a Christopher Finlayson i roto i te whare pāremata, e kore te whakataunga tiriti a Ngāpuhi e ahu whakamua, māna, ka whakarerekē a Tau i ētahi o ana tikanga me ētahi o ōna tuakiri. Hei tā Finlayson, kei te whakaweti a Tau i ētahi atu i roto i te iwi, ā, me kimi ia i te tūporetanga me te wairua pai i roto i a ia, mena rā e hiahia ana ia kia neke whakamua ngā kōrero mo te whakatau i te kokoraho nui a Ngāpuhi. Kei te haere te Minita hou i ngā Take Tiriti a Andrew Little ki te Tai Tokerau ki te kōrero ki a Tuhoronuku me Te Kotahitanga.

Ngā hua o te TPP ki ngā pakihi Māori

Hei tā te Minita Whakawhanake Rohe a Shane Jones, kaore e kore ka āta aro mātai ngā kaiwhakahaere pakihi Māori, he aha ngā hua kei roto i ngā whakahoutanga o te TPP, arā, te Trans Pacific Partnership Agreement, mō rātou. Tekau mā tahi ngā whenua i tautoko i taua kawenata tauhokohoko i te hui APEC i Vietnam i ngā rangi whakatā nei. Hei tā Jones, ahakoa kaore ētahi o te iwi Māori i te tautoko i taua kawenata, kei te hiahia ngā Uepū Whenua Māori ki tēnei kawenata kia tūwhera ai ngā mākete o te ao ki a ratou, kia pihi ake ai he hua i tā rātou mahi i o rātou whenua.

Haere a Peters ki North Korea

Tēra te whakapae ka haere a Winston Peters ki North Korea ki te kimi huarahi e tau ai te puehu i waenganui i taua whenua me Amerika. Kua roa ngā Ūpoko Tapu Nui o ēra whenua e rua e tuku kōrero hunuhunu ana ki a rāua ano, ā, e noho mataku ana te ao kei timata i a rāua, he pakanga karihi, arā, nuclear war. I te kōrero a Peters ki tētahi o ngā māngai matua o Amerika i tētahi hui i Manilla i ngā rā tata nei, ā, tēra te whakapae, ka tukuna e Amerika a Peters ki North Korea, mei kore e kitea e ia he rangaawatea.

Ka hui a Andrew Little ki a Tuhoronuku me Te Kotahitanga

Kua kakama te Minita hou i ngā take Tiriti a Andrew Little ki te karanga hui ki a Ngāpuhi i runga i te manako kia koke whakamua te whakataunga a te iwi. No te marama o Pipiri ka whakatārewahia e te peremia o te wā e Bill English te whakataunga, he hiahia nōna kia noho kotahi a Tuhoronuku me Te Kotahitanga ki te whakarite rautaki kotahi hei whakatutuki i te whakataunga, engari kaore Te Kotahitanga i whakaae. Hei taa Little, ko te whakataunga a Ngāpuhi tana mahi matua, a, e hiahia ana ia ki te hui ki ngā rangatira o te iwi i mua i te Kirihimete.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Iwi chairs feel Labour snub AFFCO targets Rangiuru unionists Views sought on Maori literacy