Te wiki tuatahi o te Kāwanatanga hou

Te wiki tuatahi o te Kāwanatanga hou

Hei tā te māngai torangapū mo Tāmaki Makaurau a Peeni Henare, i tino angitū te wiki tuatahi o te Kāwanatanga hou i tērā wiki, ka mutu, e mīharo tonu ana tōna ngākau i te tini o ngā Māori kua whai waahi ki te Kāwanatanga kā tahi, otirā, ki te kāhui minita kā rua. Hei tāna tokomaha i tuku i ā rātou oati ki te reo Māori, kā mutu, i te poipoi te māngai o te whare a Trevor Mallard i te pēpi a Willow Jean Prime ki runga i ōna pona i ētahi wā. Hei tā Henare, Ae marika, kua huri te ao, kua uru he Kāwanatanga hou ki te whare.

Mātauranga matihiko mā ngā rangatahi

E akiaki ana tētahi kaiako o mua i a tātou rangatahi Māori kia kaha te kuhu ki te ao matihiko. Tekau mā rima tau a Janie Tito e whakaako ana i roto i ngā kura tuarua, kātahi ka tahuri ki te Dev Academy ki te ako i ngā āhuatanga o te mahi i roto i te ao matihiko, inaianei, kua whakatūria e ia tāna ake pakihi hanga pae tukutuku, ko Manu te ingoa. Hei tāna, na te āhua o te marautanga i roto i ngā kura, kaore ā tātou rangatahi Māori i te kite i ngā hua nui o te ako i te mātauranga matihiko, arā, kaore te kākano i te whakatōkia ki roto i a rātou, kāore hoki rātou i te whakatūtakihia atu ki ngā tāngata angitū o te ao matihiko.

Tū tonu ngā whakamātautau NCEA ki Sacred Heart

Ahakoa te ahi i pā ki te Kura o Sacred Heart i Waikato i ngā rangi whakatā nei, ka tū tonu ngā whakamātautau NCEA i tēnei rā. I kai te ahi nei i ētahi akomanga o te kura tae atu ki te taiwhanga hui o ngā kaiako. Tokorua ngā kōhine, tekau mā iwa ngā tau kua hāmenetia e ngā pirihimana mo te tahu i taua ahi.

Hui whakamānawa i a Te Rangi Hiroa

Hei te mutunga o te marama nei ka tū te hui whakamānawa i a Te Rangi Hiroa ki roto o Taranaki, ā, ko te oranga o te maunga tītohea te kaupapa nui. Ko tētahi wāhanga nui o te hui, ko te wānanga i ngā take hauora e pā kau ana ki te iwi Māori, hei whakanui i te mahi rangatira a Te Rangi Hiroa i roto i te rāngai hauora, nōna e takatū ana i te mata o te whenua. Hei tā Colleen Tuuta o Ngāti Mutunga, e ahu ana a Taranaki ki te whakataunga mo te maunga, engari, e toko ake ana ngā pātai e pā ana ki te kaitiakitanga me te hauora o te maunga. Ka tū te hui Te Rā o Te Rangi Hiroa ki Urenui Pā hei te rua tekau mā rima o Noema nei.

35 iwi Māori tuku pūtea ki Investment Fund

Toru tekau mā rima ngā roopu whenua Māori me ngā iwi Māori e tuku pūtea ana ki tētahi Kaupapa Whakangao, arā, Investment Fund, kotahi rau miriona tāra te nui. nā te Manatū Pakihi Auaha Mahi, te Roopu He kai kei aku ringa, Ngāti Awa Group Holdings me te NZ Super Fund tēnei Kaupapa Whakangao i whakatū. Ko te whakaaro ia, mā te Kaupapa Whakangao nei ka whai waahi ngā Roopu Whenua Māori me ngā Iwi Māori ki ētahi atu rāngai whakatipu pūtea. Hei tā Paul Quinn o Ngāti Awa Group Holdings, kua tuku rātou i te rima miriona tāra ki taua Kaupapa Whakangao i tēnei wā, i runga i te manako ka puta he hua nui ki ngā uri.

Tohu Kōrero Torangapū

E ai ki te kaituhi i te pukapuka hou e pā ana ki te ture me te Tiriti o Waitangi, me kaha ake te whirinaki ki ngā tikanga Māori hei whakatau i ngā tono raupatu. Ko te ingoa o te pukapuka hou a Tākuta Carwyn Jones, ko New Treaty, New Tradition: Reconciling New Zealand Society and Māori Law, ā, i whakawhiwhia te pukapuka nei ki te tohu Kōrero Torangapū i te Pō Whakawhiwhi Tohu Pukapuka e kiia nei ko Ngā Kupu Ora i tēnei tau.

Whakaaro nui ki Te Tiriti o Waitangi

Kei te whakapātaritari ētahi mātanga hauora o te Whare Wānanga o Tāmaki i o rātou hoa mahi kia kaha ake te whakaaro nui ki te Tiriti o Waitangi kia pai ake ai tā rātou whakarite i ngā wawata hauora o te Māori. Ko Ahorangi Papaarangi Reid, Tākuta Sarah-Jane Paine, Tākuta Elana Curtis, Tākuta Rhys Jones, Tākuta Anneka Anderson, Tākuta Esther Willing me Tākuta Matire Harwood te hunga e whakapātaritari nei, ā, kua tuhia ō rātou māharahara ki te Mōheni Hauora o Aotearoa. Hei tā Ahorangi Reid, tokomaha ngā kairangahau e whai pūtea ana ki te rangahau i ngā āhuatanga o te hauora Māori, ēngari, kaore i te mārama he aha te hāngai o te Tiriti ki a rātou.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Te Aronui i a Perehitini Trump Ngā Whakatūpatotanga Mate Karauna Prime sceptic on mining value Asset sales referendum to be held