November 07, 2017
Wero ki te Human Rights Review Tribunal
Wero ki te Human Rights Review Tribunal
Kei te haere te māngai torangapū o Manurewa a Louisa Wall ki te kooti ki te wero i te whakatau ngāwari i puta i te Human Rights Review Tribunal e pā ana ki ētahi pakiwaituhi i whakaatu mai i te Māori, anō nei he mātua kino, he iwi pēnihana noa iho. Na Al Nisbett ēnei pakiwaituhi i mahi i te tau rua mano tekau mā toru. Hei tā Wall, he pakiwaituhi kaikiri ēnei.
Hoko whare ki Whangārei
Kei te haere te hunga o Tāmaki ki Whangārei ki te hoko whare mō rātou, he teitei rawa hoki nō te utu mo ngā whare ki Tāmaki, engari, na tēnei tū āhuatanga, kei te piki te utu mo ngā whare ki Whangārei, me te aha, ko ngā whānau Māori te papa. Koira tā Huhana Lyndon, tētahi o ngai tātou e whakataetae ana i ngā tūru wātea i te Kaunihera-ā-rohe o Whangārei. Hei tāna, rua tekau ōrau te pikinga ake o te utu mo ngā whare ki Whangārei, a, kaore i ngā whānau Māori te pūtea kia uru ki tēra mākete.
Taupānga tikanga Māori a KIWA
Kei te horapa haere ngā taupānga tikanga Māori a te pakihi matihiko o KIWA ki ngā Umanga o te motu. Hei tā te tāhūhū rangapū o KIWA, a Steven Renata, ko te whainga ia kia whai waahi te haurua o ngā kaimahi katoa o te motu ki ā rātou taupānga hei te tau rua mano rua tekau. I tēnei wā, ko Araraurangi Aotearoa, Spark, Vector, Vodafone, Meridian Energy, WorkSafe NZ, DOC, Te Kaunihera o Waikato me te Kaunihera o Tāmaki ētahi e whakamahi ana i nga taupānga nei.
Kua hinga a Billie Tait-Jones
Kua hinga te pou tikanga Māori o te Kaunihera o Te Whanganui-ā-Tara a Billie Tait-Jones o Tūhoe me Te Arawa. Hei tā te kāhika a Justin Lester, inā te koha nui a te kuia nei ki te rohe. Kei Pipitea marae ia e tangihia ana, kātahi ka whakahokia ki Waikaremoana.
Copyright © 2017, UMA Broadcasting Ltd: www.waateanews.com