November 01, 2017
Whai hua nui te iwi Māori
Whai hua nui te iwi Māori
Hei te Minita Whakawhanake Rohe me te Minita i ngā Take Ngahere, a Shane Jones, ka tahuri tēnei Kāwanatanga ki te whakatipu i te rāngai poro rākau me ngā mahi ki runga i nga wahapū, mē te aha, ka whai hua nui te iwi Māori i tērā. I whai a Jones i ēnei Minitatanga i raro i te whakaaetanga i waenganui i a Reipa me Aotearoa Tuatahi kia tū ai rāua hei Kāwanatanga.
Karahipi Māori Kaunihera Hauora o te motu
E tumanako ana tētahi tauira tohu kairangi nō te Whare Wānanga o Ōtākou, mā tana rangahau e pā ana ki ngā rongoā paturopi, arā, ngā antibiotic, ka heke te pā o ētahi mate ki ngā hāpori Māori. Ko Howard Maxwell te tauira e kōrerotia nei, ā, katahi anō ia ka whakawhiwhia ki te karahipi Māori a te Kaunihera Hauora o te motu. I tipu ake a Maxwell ki Ōpōtiki, ā, ka rangahau ia i ngā momo mate kua tīmata nei ki te whakatumatuma ki ngā rongoā paturopi.
Te Ahurei Toi o Tāmaki
Ka waiatahia ngā waiata a Mahinarangi Tocker e ngā wahine toa o te wā nei i tētahi konohete motuhake ka tū ki te Ahurei Toi o Tāmaki hei te Poutū-te-rangi a tēra tau. Hei tā te kaiwhakahaere i te ahurei, a Jonathan Bielski, ka whakahuihuitia ngā tohunga toi ki te ahurei hei whakamīharotanga ma te marea, ā, ka aronui te kaupapa o te ahurei ki ngā Tangata Whenua me te reo taketake o Aotearoa. Ko Mahinarangi Tocker tētahi o ngā manu tīoriori rongonui o te motu, nōnā e ora ana, ā, ka riro mā Anika Moa, Annie Crummer, Shona Laing, Nadia Reid, Emma Paki me ētahi atu āna waiata e waiata ki te ahurei.
He tohu hou ki ngā whare wānanga e ono
E mahi tahi ana ngā whare wānanga e ono kia tū he tohu hou e hāngai pū ana ki te ōhanga Māori. Ko te ingoa o te tohu ko te Master of Māori and Indigenous Business, ā, na ngā iwi me ngā pākihi ngā whare wānanga i āwhina ki te hanga i te tohu. Mā ngā kura pākihi o Te Whare Wānanga o Tāmaki, Te Kura Aronui o Tāmaki, Te Kunenga ki Purehuroa, Te Whare Wānanga o Waikato, Wikitōria me Otakou te tohu nei e pīkau. Hei tā Manuka Henare o Te Whare Wānanga o Tāmaki, ka ako ngā tauira i ngā āhuatanga motuhake e pā ana ki ngā pākihi Māori me te ōhanga Māori.
Copyright © 2017, UMA Broadcasting Ltd: www.waateanews.com