October 30, 2017
Minita i ngā Take Mahi
Minita i ngā Take Mahi
E ai ki te Minita hou i ngā Take Mahi a Willie Jackson, e kore ia e titiro noa ki ngā tatauranga hei āwhina i a ia ki te whakatutuki i ngā whainga o tāna mahi hou. Hei tāna, i tino whakatairanga te Kāwanatanga o mua i ngā tatauranga mahi o te wā hei tohu i te whai mahi a te marea i raro i to rātou maru, engari, hei tā Jackson, tokomaha o taua marea rā kaore i whai mahi toitū, nā reira, i hē ngā tatauranga i te whakatairangitia rā.
Whakakore ngā paearu mātauranga o te motu
Kei te māharahara a Mahia Nathan, tumuaki o te Wharekura o Manurewa, ki te hiahia o te Kāwanatanga hou ki te whakakore i ngā paearu mātauranga o te motu. Hei tāna, ki te whakakorea ēra paearu mātauranga, he aha te kaupapa ka whakatūria hei whakakapi i ngā whāwhārua? Heoi, hei tāna, me whānui ake te aronga o ngā paearu mātauranga kia whai wāhi ai ngā take Māori ki roto, pēnei i te kapa haka me te reo. Kua tīmata kē te Minita hou i ngā take Mātauranga a Chris Hipkins, ki te kōkiri i te kaupapa e korehāhā ai ngā paearu mātauranga i whakatūria ai e te Minita o mua, e Hekia Parata.
Whakatūpato ki ngā iwi o Te Tai Tokerau
E rere ana te whakatūpato i te Minita Whakawhanake Rohe i a Shane Jones, ki ōna iwi o te Tai Tokerau, ki te kore rātou e pirangi ki ngā mahi whakatō rākau, ka hoatu taua mahi ki iwi kē, ki iwi rāwaho. Ko te whai a Jones kia tō te kotahi piriona rākau, ā, mā ngā iwi e mahi kia whai ai rātou i ngā hua. Hei tā Pita Tipene o Ngāti Hine, he pai tēnei kaupapa a Shane Jones, me te aha, ka whai a Ngāti Hine i te katoa o te pūtea mo te mahi nei, arā, e kore e mate ki te whakahoki pūtea ki te Kāwanatanga. Kua kī kē atu a Ngāti Porou ki a Jones, e rite ana rātou ki te kawe i te mahi nei ki roto i te Tai Rāwhiti.
30,000 whare ki Paerata
Kua pānui mai te Minita hou i ngā take whare, a Phil Twyford, i tāna rautaki hou e tū ai te toru tekau mano whare ki Paerata i te tonga o Tāmaki, hei roto i ngā tau tekau e tū mai nei. Hei tāna, rima tekau mano tāngata ka noho ki roto i aua whare. Hei tā Ahorangi Ella Henry, kairangahau i ngā take whare no Ngāti Kahu, ahakoa ngā amuamu a ētahi mo te kaupapa nei, e tika ana kia tīmata te Kāwanatanga ki te kimi rongoā mo ngā raru whare o te wā.
Pūrongo hou a Waipareira
Kua puta te pūrongo hou a Te Whānau o Waipareira e pā ana ki ngā piki me ngā heke o tana mahi nui i te toru tekau tau nei, tae atu ki ngā hua nui kua puta. Hei tā Tanya Allport o te Pokapū Rangahau o Te Whānau o Waipareira, i uiuitia ngā whakatipuranga e toru o tēna whānau, o tēna whānau, kia oti ai te pūrongo nei, ko Ka Pū te Wai o Pareira te ingoa. He mea whakatere te pūrongo nei i runga i te marae o Hoani Waititi.
Copyright © 2017, UMA Broadcasting Ltd: www.waateanews.com