October 23, 2017
He aitua ki Māwhera
He aitua ki Māwhera
Kua mau i ngā Pirihimana te tangata, i te kimihia e rātou, whai muri iho i te pupuhitanga o Hayley Williams i Māwhera e rua rā ki muri nei. He māmā a Williams, tokotoru āna tamariki, ēngari, e ai ki ngā whakapae, i pūhia ia i roto i tana kāinga i te rā tapu. I mau i ngā pirihimana a George Warren, e whā tekau mā rima ngā tau, tata ki te marae o Arahura inapō, i runga i te heitara, he waahi nui tōna ki tēnei mate weriweri nei.
Whakatere waka Whale Watch Kaikōura
E hurō ana a Whale Watch Kaikōura, e rua o o rātou waka kua whakaterehia e rātou ki runga i te moana i mua i te taenga mai o te raumati, arā, i te wā nui o te tau mō rātou i te tokomaha o ngā tūruhi ka tae ki te rohe. Tekau marama tō rātou waka Aoraki e whakatikahia ana ki roto i Te Whanganui-ā-Tara, ā, katahi anō ka whakahokia ki a rātou. Nā te rū whenua i te Whiringa-ā-rangi i tēra tau, i kore ai te wahapū o te rohe, engari, kua pai inaianei hei whakatere mā Whale Watch Kaikōura i o rātou waka.
Kaupapa matua o te Kāwanatanga hou
Ka tohua e te Kāwanatanga hou ā rātou kaupapa matua hei whakatutuki mā rātou i tēnei rā. Hei tēnei rā anō hoki, ka mōhio tātou mena rā kua whakaae a Winston Peters kia noho ia hei peremia tuarua o te motu. Kei te tukuna he tūranga minita ki a Kelvin Davis rāua ko Nanaia Mahuta ki roto i te Rūnanga Minita, ā, kua whai tūranga minita a Peeni Henare, Meka Whaitiri me Willie Jackson ki waho i te Rūnanga Minita. Hei te roanga o te wiki nei, ka mōhio tātou, he aha koia pū aua tūranga minita rā. Hei tā Davis, kei te pirangi ia kia mahi tonu ia ki roto i ngā kaupapa whare herehere, ā, tēra te heitara ka hoatu te tūranga Minita Whakawhanake Māori ki a Nanaia Mahuta.
Whakaari hou "Te Pō"
Kei te whakamātau te kaiwhakaari tautōhito rā, a Rawiri Paratene ki te waiata i ētahi o ngā waiata rongonui o te ao Māori i roto i tana whakaari hou, ko Te Pō te ingoa. Hei tā Paratene, nā Prince Tui Teka rāua ko Eddie Low ētahi o ngā waiata ka waiatahia e ia. I whakatūwherahia te whakaari Te Pō ki te Q Theatre i ngā rangi whakataa nei, hei te tuawhā o Noema ka mutu.
Ngā mahi kōwiri hinu
E karanga ana a Greenpeace New Zealand kia whakatū rāhui te Kāwanatanga hou ki runga i ngā mahi kōwiri hinu i o tātou moana. Hei tā tō rātou tāhūhū rangapū a Russel Norman, kaore te Kāwanatanga o mua i tino aro ki ngā hua kino ka puta ki te taiao i te kōwiritanga o te papa moana.
Copyright © 2017, UMA Broadcasting Ltd: www.waateanews.com