October 16, 2017
Hoko Pakihi Tāpoi a Ngāti Tūwharetoa
Hoko Pakihi Tāpoi a Ngāti Tūwharetoa
Kua hoko te Poari o Ngāti Tūwharetoa i te pakihi tāpoi e kiia nei ko te Lake Taupo Hole in One Challenge. Koia tētahi o ngā pakihi tāpoi rongonui o Taupō, ā, hei tā te heamana o te Poari, a Tiwana Tible, i roto i ōna tau rua tekau mā whā kua tino angitū taua pakihi.
Kapa Haka ki Te Whare Herehere Wāhine o Otautahi
Kei te tino whai hua ngā wāhine o te Whare Herehere o Otautahi i te Kapa haka. Tokoiwa ngā mauhere wāhine o taua whare kua whai i wā rātou tohu taumata tuatoru i te kapa haka, i te Te Wānanga o Aotearoa. Hei tā Junior Tana, kaitakawaenga Māori o ngā Whare Herehere o Te Waipounamu, koinei te tohu mātauranga tuatahi a ēnei wāhine nei, ā, i a rātou e whai ana i te tohu, i kite hononga rātou ki o rātou taha Māori hei oranga nui mō rātou.
Karahipi Winston Churchill
Kua whai a Anton Blank, ūpoko o mua o te kāhui mana ririki i te Karahipi Winston Churchill e hāere ai ia ki Taiwan me Ūropi ki te whakatutuki i tāna rangahau e pā ana ki te kaikiritanga me ngā whakaaro whakatuanui. Ko te mātauranga ka mau i a ia , ka whakahokia mai ki Aotearoa hei akoranga mā tātou.
Mahi toi Māori i Te Whare Toi ō Te Awakairangi
Kua puta te whakatau i te Whare Toi ō Te Awakairangi, arā, i te Dowse Art Museum, me nui ake tana whakaatu i ngā momo mahi toi nā te Māori i mahi. Hei tā te tumu whakahāere a Courtney Johnston, ahakoa te iti o te pūtea hei whakapau mā rātou, e tika ana kia āta whai rātou i ngā mahi toi huhua kia kitea ai ngā ahurea maha i roto i te whare toi. Kua tahuri rātou ki te hoko i ētahi whakaahua i mahia e Ngahuia Harrison o Ngāti Wai, ētahi kōhatu i whakairohia e Neke Moa, me tētahi pakoko i whakairohia e Lonnie Hutchinson o Ngai Tahu.
Copyright © 2017, UMA Broadcasting Ltd: www.waateanews.com