Te iwi Māori ki roto Whare Pāremata

Te iwi Māori ki roto Whare Pāremata

E whakapono ana te kaiarahi o mua i te roopu Mana Motuhake a Sandra Lee, e tino tika ana kia whai roopu Māori motuhake te iwi Māori ki roto i te whare pāremata. Hei tāna, ko te tino take i huri tuarā ai nga kaipooti Māori ki te RTM, na te mea, i roa rawa tā te noho RTM piri ki a Nahinara.

Nga roopu whare Māori

Hei taa te roopu whare Māori e kiia nei, ko Te Matapihi, i te korenga o te RTM hei reo mo tātou ki te whare pāremata, me takatū ake ngā roopu pēnei i a rātou, pēnei hoki i te Kāhui Rangatira-a-Iwi ki te kawe me te kōkiri i ngā wawata o te ao Māori. Hei tā ngā māngai o Te Matapihi, kei te whakaae te nuinga o ngā roopu torangapū, he raru nui te kainga koretanga, he raru nui hoki te mākete whare.

Hōtaka hou kaikanikani rangatahi

Kua tahuri te roopu kanikani o Atamira ki te ipurangi ki te kohi pūtea hei huruhuru mo tētahi hōtaka hou ma ngā kaikanikani rangatahi. Hei tā Kelly Nash o Atamira, kua oti he whakaari kanikani te tuhi, ko Atamira te ingoa, ēngari, kei te kimi i te tekau mā rua mano tāra kia pai ai te utu i ngā kaikanikani tokotoru, i a Imogen Tāpara, Rosie Tapsell me Manuel Solomon kia tutuki ai te kaupapa.

Turu Māori ki roto Whare Paremata

Hei taa te māngai torangapū mo Hauraki Waikato a Nanaia Mahuta, kua kī ngā kaipooti Māori, me panoni i te Kāwanatanga i ā rātou pooti ki a Reipa i roto i ngā tūrū Māori e whitu katoa. I māmā noa iho te kapohanga anō a Mahuta i te tūrū o Hauraki Waikato, ahakoa te pai o te wero a Rāhui Papa o te RTM. Hei tā Mahuta, i ngaro i te RTM ngā tūrū e rua i te kōwhiringa pooti o te tau rua mano tekau mā whā, me te aha, mai i taua wā ki naianei, kāore anō rātou kia ako.

Te hōtaka Whānau Tahi Navigator

Kua waitohu waikanaetanga te pākihi a Waipareira, arā a Whānau Tahi ki te pākihi o Arctic Information Technology kia riro mā rātou te hōtaka Whānau Tahi Navigator e tohatoha ki ngā iwi o te raki o Amerika. Hei tā te tāhūhū rangapū o Arctic IT, a Dave Bailey, kāore e kore ka whai hua ngā iwi taketake o te rohe i tēnei hōtaka hou nei, e whakatutuki ana i ngā wawata kia noho ngā kōrero hauora katoa mo aua iwi ki te waahi kotahi.

Whenua mana nui o Te Akitai/Waiohua

Kei te mahi tahi te iwi o Te Akitai/Waiohua me te Kaunihera o Tāmaki ki te tiaki i tētahi o nga tūtohu whenua mana nui o te takiwā. I whakahāere whakataetae eke motopaika ki te rua puia o Te Pūkaki Tapu o Pou-tu-keka i te tīmatanga o tēra rautau, ā, nā tēra mahi i tānukunuku ai te whenua i roto i taua rua. Hei tā te māngai mo Te Akitai/Waiohua otirā, te ūpoko o te Tarahiti o te Marae o Pūkaki a Karen Wilson, ki te tānuku tonu te whenua o taua rua puia, ka ngaro ētahi urupā, me ētahi pā tawhito.

Follow us on &

Copyright © 2017, UMA Broadcasting Ltd: www.waateanews.com

RELATED NEWS

Private Manurewa foodbank facing homelessness Wairarapa Māori wary of irrigation Busting out poi for app launch